Midde gerónje veurklinker

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De midde gerónje veurklinker of gerónje midde veurklinker is 'ne klinker dae in sómmige gespraoke tale veurkump. 't Symboeal det bie 't Internationaal Fonetisch Alfabet gebroek wuuertj is [ø̞] of [œ̝].

Kènmirke

Kènmirke vanne midde gerónje veurklinker zeen:

• De vokaalhuuegdje is midde, det inhèltj det de tóng zich halverwaeges tössen 'nen toewe klinker en 'nen aope klinker bevindj;
• De vokaalposiesje is veur, det inhèltj det de tóng zich zoea wied nao veur wie meugelik inne móndj bevindj zónger 'n gans toew vernejjing te make;
• De klinker kan zeen:
  • geróndj-samegedrök, det mèntj det de renj vanne luppen aangespanne zeen en zoea waere samegetróch det de binnekantj vanne luppe neet nao boete kómme;
  • geróndj-oetstaekendj, det mèntj det de heuk vanne luppe waere samegetróch enne binnekantj vanne luppe bloeatligke.

Limbörgs

De korte variantj vanne midde gerónje veurklinker kan in 't Limbörgs veurkómmen es 'nen allofoon vanne bao-toewe gerónje centraal-veurklinker [ʏ] u, beveurbeildj in 't Mofers, wo d'r meistes wuuertj oetgespraoken es 'nen toe-midde gerónje veurklinker [ø].

In sómmige dialekte, mit naam in 't zujelik Limbörgs spraokgebied, kump onna de lange variantj èù veur. Deze kóntrasteertj den mitte langen toe-midde gerónje veurklinker [ø:], gesjreven es eu, ennen aop-midde gerónje veurklinker [œ:], gesjreven es äö.

Op 't Kirkräödsj guldj de [œ̝] es de standerd oetspraok veure ö, wo anger dialekte meiste d'n aop-midde gerónje veurklinker [œ] broeke.