Alveolairen approximant

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

d'n Alveolairen approximant of alveolair glitsjklank is 'ne mitklinker dae in versjillige gespraoke tale veurkump. 't Symboeal det bie 't Internationaal Fonetisch Alfabet gebroek wuuertj is [ɹ]. d'n Alveolairen approximant haet feitelik twieë variantje (zuuch bie kènmirke).

Pósalveolair en lichtelik gelabialiseerdj is dit de Brits Ingelse <r>: [ɹ̠ʷ]. Wiejer kump de klank ouch veur in 't dialek van Leie.

Kènmirke

Kènmirke vannen alveolairen approximant zeen:

• De meneer van oetspraok is approximant, det inhèltj det t'r wuuertj vervaerdig door 't spraokkenaal te vernejjen oppe oetspraokplaats, meh neet zowied det 'nen turbulente lóchstroum óntsteit;
• 't Guuef twieë oetspraokplaatse;
  1. Waor alveolair, [d̳], det inhèltj det t'r wuuertj oetgespraoke mit of d'n tóngspits of 't tóngblaad taenge d'n tandjwal (apicaal taenge laminaal);
  2. Pósalveolair, [ḏ], det inhèltj det t'r wuuertj oetgespraoke mit of d'n tóngspits of 't tóngblaad achteren tandjwal (apicaal taenge laminaal);
• De artikulaasje is stumhöbbendj, waat mèntj det de stumbenj trille bieje oetspraok;
• Ze is 'nen orale mitklinker, waat mèntj det de lóch allein dore móndj eweg kan kómme;
• Ómdet dees klank neet wuuertj gemaak door lóchstroum euvere tóng, geldj de dichotomie van centraal taenge lateraal mitklinkers neet;
• 't Lóchstroummechanisme is pulmonisch, det mèntj det de klank wuuertj gemaak door lóch die allein dore lónge en 't middereef wuuertj geduujdj, wie bieje meiste klenk.

Limbörgs

Dees klank kump normaal gespraoke neet veur in 't Limbörgs, mit oetzunjering van snel spraok.