Labiodentale nasaal

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

De labiodentale nasaal of labiodentaal naasklank is 'ne mitklinker dae in väöl spraoke veurkump. 't Is aevel neet good dudelik of dees klank contrastief veurkump in 'n spraok, es e richtig foneem. Kwa klank geliek ze den ouch de bilabiale nasaal hieël väöl; de twieë zeen lestig te óngersjeien in 't gehuuer en zeen döks allofoon variantje vanein. 't Symboeal det bie 't Internationaal Fonetisch Alfabet gebroek wuuertj is [ɱ].

De labiodentale nasaal ligk tösse de bilabiale nasaal ennen alveolaire nasaal in.

Kènmirke

De kènmirke vanne labiodentale nasaal zeen:

• De meneer van oetspraok is occlusief, det mèntj det t'r wuuertj gemaak doordet de lóchstroum in 't spraokkenaal wuuertj toegepaotj. Ómdet deze mitklinker ouch nasaal is, wuuertj de geblokkeerdje lóchstroum ómgelèdj dore naas en is t'r 'ne nasaal;
• De oetspraokplaats is labiodentaal, det inhèltj det t'r wuuertj oetgespraoke mitte óngerlup enne baovetenj;
• De artikulaasje is gewuuenlik stumhöbbendj, waat mèntj det de stumbenj trille bieje oetspraok;
• Hae is 'ne nasale mitklinker, waat mèntj det de lóch eweg kan kómme dore naas, zowaal ech allein dore naas (nasaal oetsjeijing) of dore naas en ouch de móndj;
• Ómdet dees klank neet wuuertj gemaak door lóchstroum euvere tóng, geldj de dichotomie van centraal taenge lateraal mitklinkers neet;
• 't Lóchstroummechanisme is pulmonisch, det mèntj det de klank wuuertj gemaak door lóch die allein dore lónge en 't middereef wuuertj geduujdj, wie bieje meiste klenk.

Limbörgs

In 't Limbörgs kump de labiodentale nasaal allein sómtieds veur es allofoon veure bilabiale nasaal, en nag sporadischer es allofoon veuren alveolaire nasaal. In 'n stumloeas ómgaeving kan d'r zelf ouch stumloeas waeren oetgespraoken es [ɱ̊], en nao 'ne sleiptoean ouch verlingk, wie in lymfeknoup ['lɪ́ɱ̊:fəkn̥ɒ́ʊ:p].

Juus wie bie de anger nasalen in 't Limbörgs wuuertj döks 'ne (zaachte) plosief oetgespraoke wen de nasaal wuuertj opgevolg door 'ne sibilant of fricatief.