Äöpen houfmenu

Wereldkampioensjap hierevoetbal 2022

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


't Wereldkampioensjap hierevoetbal 2022 weurt 't 22e WK hierevoetbal. 't Toernooj, georganiseerd door de FIFA, zal weure gehawwe in Qatar. Um de extreem hits die 't land in de zomer plaog zal 't WK 's winters plaotsvinde, vaan 21 november tot en mèt 18 december. 32 teams oet vief of zès confederaties zalle ziech plaotse, volgens 'tzelfde formaot wie dat al sinds 1998 weurt aongehawwe; 't zal de lèste kier zien tot me mèt 32 len späölt.

Qatar kraog 't WK 2022 in 2010 touwgeweze. Direk daonao braok de controverse oet. Ierstens umtot Qatar koelek 'n voetbaltraditie had; me meinde tot de FIFA allein veur 't groet geld vaan 't oliestäötsje waor gegaange. Dit verwiet woort versterk doortot op dezelfde sessie Rusland 't WK veur 2018 kraog touwbedeild. Later woorte diverse FIFA-leie, boe-oonder ex-UEFA-veurzitter Michel Platini, expliciet vaan passief umkouping besjöldeg. Ouch zwoer kritiek gaof 't op de oonminseleke en gevierleke umstendeghede boe-in de dèks Zuid-Aziatische bouwers de stadions móste bouwe; diverse vaan hun kaome um. Wijer kritiek kaom op de minserechtesituatie vaan 't land in 't algemein. Ouch 't praktisch punt vaan de te hoeg temperature woort gemaak; hei-um woort beslote veur 't WK nao november en december te verzètte.

VerkezingBewirk

De oetverkezing woort rillatief vreug geregeld. Len kóste ziech tot 2 fibberwarie 2009 kandidere veur zoewel 't WK vaan 2018 es dat vaan 2022. De FIFA wèlt 't WK doen roulere tösse de continente; confederaties die e WK hawwe zien de twie volgende WK's daorum oetgeslote. Len vaan de CAF (Afrika) kaome zoedoende neet in aonmerking veur 't WK vaan 2018 (umtot 't WK vaan 2010 al in Zuid-Afrika waor); len vaan de CONMEBOL (Zuid-Amerika) kóste gaaroet neet mètdoen (um 't WK vaan 2014 in Brazilië). Ouch de confederatie die 't WK vaan 2018 pakde, zouw later op deenzelfden daag neet mie kinne mètbeeje veur 2022.

Oetindelek woort op 2 december 2010 gestump. 't WK vaan 2018 góng nao Rusland; de UEFA (Europa) waor dus oetgeslote. Oetindelek bleve vijf bode euver (e zèsde, vaan Indonesië, waor in fibberwarie vaan dat jaor al door de FIFA verworpe). Qatar waor al vaanaof de ierste stumrunde favoriet, meh haolde pas in de lèste de absolute mierderheid.

Land R. 1 R. 2 R. 3 R. 4
Qatar 11 10 11 14
Vereinegde Staote 3 6 5 8
Zuid-Korea 4 5 5
Japan 3 2
Australië 1

ControversesBewirk

Besjöldeginge vaan umkoupingBewirk

Nao de verkezing kloonk astrein de besjöldeging tot de FIFA ziech hej door 't riek Qatar hej laote umkoupe. E lid vaan 't Qatarees lobbyteam verklaorde in 2011 tot häör land Afrikaanse FIFA-leie hej betaold. Ze lag dao later contrair verklaoringe euver aof. In 2014 woorte de verdinkinge concreter wie aon 't leech kaom tot Jack Warner, ex-veurzitter vaan de CONCACAF, twie mieljoen dollar had aongenome vaan 'ne Qatarese firma.

Vief vaan de zès hoofsponsore droonge daonao bij de FIFA op 'n oonderzeuk aon. Nao 'n intern oonderzeuk bleek volgens de FIFA tot in eder geval 't comité vaan Qatar niks verkierd hej gedoon. In 2015 evels deeg justitie 'nen inval in 't hoofketoer vaan de FIFA in Zürich, boebij diverse hoeg functionaire woorte gearresteerd. De sjendaole bleve de jaore dao-op dore.

Slechte arbeidsumstendeghedeBewirk

Nao e paar jaor kaome beriechte binne euver de slechte umstendeghede boe de arbeiers, veural oet India en Nepal, oonder móste wèrke. Ze maakde hendeg lang werkdaog, woorte oonderbetaold en móste hun paspoort inlievere bij hunne baas. Ouch woort hun verbooje hun femilie te zien nao d'n eerdsjók vaan 2015. Dit kaom volgens väöl lui en organisaties neer op modern slaovernij. Door de slechte umstendeghede waore tösse 2010 en 2013 volgens The Guardian al mie es 500 Nepalese en mie es 700 Indiase bouwvakkers umgekoume. Es me dat extrapoleert, kós dat oploupe tot 4.000 tege d'n tied tot 't WK begint. Diverse lui oet 't voetbal, oonder mie KNVB-veurzitter Michael van Praag, droonge bij de FIFA trop aon tot me de regering vaan Qatar op de rechte vaan bouwlui zouw aonspreke.

Naotot de claims vaan korterbij woorte oonderzoch, bleek 't aontal vaan 1.200 doeje bleek neet te koume vaan de projekte roond 't WK, meh sloog op alle doeje die bij bouwprojekte in Qatar waore gevalle. Qatar heet in totaol mie es twie mieljoen boetelandse bouwvakkers. In 2017 woorte ouch de rechte vaan arbeiers in 't land sterk vergroet: me maag noe zie deensverband beïndege en 't land verlaote. Dit nump evels neet eweg tot de umstendeghede nao westerse maote extreem slech en gevierlek blieve. Wieväöl lui tegen 't begin vaan 't WK zalle zien gestorve in de bouw, is neet dujelek.

Gezeen dit alles meinde väöl lui tot me in zoe'n stadions neet fetsojndelek kós voetballe. Sommege repe op tot 'ne boycot.

Minserechte in 't landBewirk

Neve de zwoer kritiek op de behandeling vaan bouwvakkers gaof 't ouch kritiek op de algemein minserechte in 't land. Bij de Olympische Winterspeule vaan 2014, in Rusland, had 't kritiek gegeve op 't gebrek aon democratie en de behandeling vaan homoseksuele. Critici merkde toen op tot dit a fortiori gol veur Qatar.[1]

Oontbreke voetbalcultuurBewirk

Alum kloonk ouch 't verwiet tot 't land 'n voetbalcultuur mis. 't WK zouw niks aanders es 't späölselke vaan de sjeik zien, en oonder de bevolking noets kinne leve. Dees kritiek verminderde get naotot 't nationaol èlftal vaan 't land in 2019 kampioen vaan Azië woort.

KlimaotBewirk

Väöl lui meinde ouch tot Qatar de verkierde keus waor um 't klimaot. In 't land en de wij umgeving weurt 't in de zomer gemekelek bove de 40°C; temperature tot 50°C zien zelfs meugelek. Zelfs mèt oetgebreide drinkpauzes (die ieder, beveurbeeld bij 't WK vaan 2014 in Brazilië, woorte ingelas), is 't oonminselek um hei-in te sporte.

De organisatie vaan 't WK zaog de zin vaan die kritiek in; hei-um woort 't evenemint nao de winter verplaots. Me zouw um dezelfde rei ouch de Confederations Cup mote verplaotse. Dat góng evels neet; me besloot dat toernooj daorum in 2021 neet te hawwe. Later woort die beslissing definitief; de Confederations Cup vaan 2017 in Rusland is daomèt de lèste gebleke.

KwalificatieBewirk

Discussie euver oetbreiing nao 48Bewirk

FIFA-veurzitter Gianni Infantino stèlde in 2018 veur 't WK vaan 2022 al oet te breie nao 48 deilnummende len. Ieder waor al beslote um op 't WK vaan 2026 zoeväöl len touw te laote.[2]

Oetindelek bleek dit neet haolbaar, oonder mie umtot Qatar heiveur vaan stadions in naoberlen gebruuk hej mote make en de relatie tösse Qatar en zien naobers in 2018 hendeg oonder spanning kaom te stoon. Me gebruuk daorum noe nog de klassieke verhajdinge:

Haaf plaotse zien play-offplaotse. Teams die ziech daoveur kwalificere, speule tegen e team vaan 'n aander confidderatie um 'n plaots op 't WK.

Afrika (CFA)Bewirk

De kwalificatie vaan de CFA gebäört in drei rundes. De confidderatie kint 54 landeteams, die speule um vief plaotse.

De 28 zwaakste daovaan (volgens de FIFA-Wereldraanklies) naomen 't in de ierste runde tegenein op; rillatief sterke len woorte heibij tege rillatief zwake geloot. De 14 paore die zoe oontstoonte, späölde twie kier tegenein. De 14 winners vaan die confrontatie struimde door nao de twiede runde. De matche woorte tösse 4 en 10 september 2019 aofgewèrk.

In de twiede runde struime de 26 (op pepier) sterker teams vaan Afrika in; mèt de 14 oet de ierste runde maak dat 40. Die weure verdeild in tien poules (A-J) vaan veer. Alle teams in 'n poule speule daan twie kier tegenein. De tien winners goon door nao de daarde runde. De twiede runde begint in miert 2020.

In de daarde runde speule de tien winners nog twie kier (toes en oet) in paore tegenein. De vief winners goon daan nao 't WK.

Azië (AFC)Bewirk

In Azië vèlt de kwalificatie veur 't WK vaan 2022 same mèt die veur 't Aziatisch kampioensjap vaan 2023. Hei zien, boete 't otomatisch geplaots Qatar, veer plaotse te winne, plus ein play-offplaots. Dit gebäört in drei rundes. De AFC kint 46 landeteams.

In de ierste runde späölde de twelf minste teams (weer volgens de FIFA-raanklies) in paore tegenein. De zès winners gónge door nao de volgende runde. De matche woorte gespäöld op 6/7 juni en 11 juni 2019.

In de twiede runde struimde alle aander len in; ouch Qatar deeg mèt aongezeen dat ziech wel nog mós plaotse veur 't Aziatisch kampioensjap. De in totaol 40 teams (34 instruimers plus de zès winners vaan de ierste runde) weure in ach poules vaan vief verdeild. De ierstes (aofgezeen vaan Qatar) goon zoewiezoe door nao de daarde runde. De twiedes weure gesjik vaan bèste nao minste; de veer bèste daovaan goon ouch door. Zouw Qatar noe bij die twelf teams zitte - op dit memint (oktober 2019) is dat hendeg reëel - daan nump de vijfde nommer twie de plaots euver. De twiede runde begós in september 2019 en zal goon tot juni 2020.

Zoe krijg me dus twelf teams. In de daarde runde weure die in twie poules vaan zès verdeild. De ierste twie vaan eder poule struime door nao 't WK. De twie daardes speule daan iers nog tegenein (in wat me al 'n veerde runde kin neume); de winner daovaan späölt weer tegen e team oet 'n aander confidderatie.

Europa (UEFA)Bewirk

De Europese fidderatie UEFA umvat 55 teams, boevaan 'rs 13 op 't WK welkom zien. 't Perceis formaot is nog neet bekind. Me is vaan plan um de UEFA Nations League vaan 2020 en '21 hei deils aon te kóppele, oongeveer wie dat mèt de editie vaan 2018 en '19 geit gebäöre bij de kwalificatie veur 't EK vaan 2020.

Noord-Amerika (CONCACAF)Bewirk

De CONCACAF umvat 35 teams. De kwalificatie zal loupe vaan september 2020 tot en mèt oktober 2021.

Umtot 't binne de CONCACAF groete niveauversjèlle gief, speule de zès sterkste len apaart in 'n competitie tegenein. De drei boveste len plaotse ziech direk. Oonderwijl goon de 29 aander teams in ach poules vaan drei of veer len tegenein speule. De winners vaan eder poule speule daan drei knock-outrundes (kwartfinaal, haaf finaal en finaal). De winner vaan de finaal späölt daan tege de nommer veer oet de poule vaan de zès sterke len. Wee die confrontatie wint, geit op veur de intercontinentaol play-offs,

Oceanië (OFC)Bewirk

De OFC umvat èlf teams, die veur mer ein play-offplaots speule. De competitie indeg in november 2021; 'ne begindatum is nog neet bekind. Ouch 't späölformaot moot nog weure bepaold.

Zuid-Amerika (CONMEBOL)Bewirk

De tien len vaan de Zuid-Amerikaanse boond zalle wie gebrukelek in 'n competitie tegenein speule. De veer bèste goon direk nao 't WK, de vijfde geit op veur de play-offs. Dees competitie zal in miert 2020 beginne en in november 2021 indege.

Play-offsBewirk

De play-offs weure gans aon 't ind vaan de kwalificatie gehawwe, in miert 2022. Veer vaan de zès fidderaties (AFC, CONCACAF, CONMEBOL en OFC) zien drin betrokke. Welke federatie tege welke geit speule, zal nog mèt 'n loting weure bepaold.

StadionsBewirk

De mieste stadions zien allewijl (juli 2019) nog in aon- of umbouw. Umtot de regering gein foto's vaan de bouwplaotse touwliet, zien daovaan gein rechtevrij foto's besjikbaar.

Späölstad Stadion Capaciteit Pleetsje
al-Chor Al-Baytstadion 60.000
Dawhah Chalifah Internationaol Stadion 40.000  
Oonderwiesstadstadion 45.350
Ras Aboe Aboed-stadion 40.000
Ath-Thoemamahstadion 40.000
Lusail Lusail Iconic Stadium 86.250
ar-Rajjaan Ahmed bin Ali-stadion 44.740  
al-Wakrah Al-Dzjanoebstadion 40.000

GrópsfaasBewirk

De ierste match zal op 21 november weure gespäöld. In aprèl 2022 is de loting.

Knouck-outfaasBewirk

De finaal is op 18 december in Dawhah (Doha).

RifferentiesBewirk