Iraons hierevoetbalèlftal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

't Iraons hierevoetbalèlftal vertreujt Iran in internationaol voetbalmatche. 't Team huurt al jaorelaank tot de bèste vaan Azië (wat al-evel e rillatief zwaak voetbalcontinent is), en tèlt allewijl ouch wereldwied good mèt.

Historie

De Perzische voetbalboond woort in 1920 opgeriech. Al in 1926 toerde 'n èlftal door de Sovjet-Unie, in 't bezunder door Azerbeidzjan. 'n Officieel erkind nationaol team woort in 1941 geformeerd. Zienen ierste match späölde Perzië tegen Afghanistan (0-0). Twie daog iejer had 't team al 'ne neet officiële match tege Brits-Indië gespäöld (1-0 wins). Toch gaof 't in die beginjaore nog diverse len die e stök wijer waore. Vaan Turkije woort in 1950 mèt 6-1 verlore, vaan Zuid-Korea in 1958 mèt 5-0.

In de jaore zèsteg góng 't beter. Iran deeg in 1968 veur 't iers mèt aon de Asia Cup en won ze direk. Dit herhaolde 't land in de edities vaan 1972 en 1976. In dat lèste jaor woorte ze ouch nog veerde op de Olympische Speule. In 1978 kwalificeerde 't land ziech veur 't iers veur 't WK voetbal.

Nao de Islamitische Revolutie vaan 1979 stortden 't voetbal in. Sport woort veur manslui neet verboje, meh had neet de hoegste prioriteit. Daobij kaom 't land mèt diverse aander Aziatische len in conflik, wat 't speule vaan internationaol matche oonmeugelek maakde. Ouch binnelandse competities lepe vas op doorloupende oonras in 't land. Zoedoende stèlde 't Iraons voetbal in de jaore tachteg wieneg veur.

Pas in 1989 kós de nationaol competitie obbenuits opstarte. Vaanaof toen góng 't weer beter mèt 't Iraons voetbal. Op de Asia Cup vaan 1996 haolde ze oonder mie 'n 3-0 euverwinning op Saoedi-Arabië en 'ne 6-2 tege Zuid-Korea. Twie jaor later góng Iran veur 't iers in twinteg jaor weer nao 't WK. In de kwalificatie had 't team mèt wel 17-0 vaan de Maledive gewonne; op 't WK zelf haolde ze 'n politiek zwoer belaoje euverwinning op de Vereinegde Staote. Oondaanks nog e good optrejje op d'n Asia Cup 2000 (en 'n nui recordeuverwinning - 19-0 - tege Guam) misde ze 't WK vaan 2002. In 2006 waore ze wel weer debij, meh presteerde ze wieneg. Nao dat WK woort 't team korten tied gesjors oet de FIFA umtot me voont tot 't rezjiem ziech te väöl in de sport mingde.

Nao 'n aontal jaore vaan sportieve ermeuj, boebij ouch 't WK vaan 2010 neet gehaold woort, kierde 't tij wie in 2011 de Portugees Carlos Queiroz aontraoj. 't Lökde häöm um Iran nao de WK's vaan 2014 en 2018 te trèkke. Op d'n Asia Cup vaan 2019 woort Iran zelfs twiede, de bèste prestatie sinds de jaore '70. Nao dat toernooj woort heer opgevolg door de Belsj Marc Wilmots en daonao door de Kroat Dragan Skočić. Oonder hun wis Iran ziech ouch veur 't WK vaan 2022 in 't kortbij Qatar te plaotse. In 2022 kaom Queiroz weer trök es trainer.