Tunesisch hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
.jpg)
't Tunesisch hierevoetbalèlftal (bijnaom نسور قرطاج nusūru qarṭāǧ 'erende vaan Carthago') vertreujt Tunesië in internationaol voetbalmatche. 't Team huurt vaanajds al bij de betere vaan Afrika en heet diverse kiere zien opwachting gemaak op e Wereldkampioensjap.
Historie bewirk
In Tunesië gaof 't al vreug 'n nationaol competitie, boe-oet in 1928 'n oonofficieel èlftal woort geformeerd. Dit team naom 't op tege e Frans B-team; 't verloor mèt 8-2. In 1932 woort veur 't iers gewonne, en wel tege Frans-Algerije (1-0). Toesstadion waor in die daog 't Velodroom in Tunis.
'n Officieel nationaol team woort pas geformeerd naotot Tunesië oonaofhenkelek woort vaan Fraankriek, in 1956. D'n iersten officiële match waor op de Pan-Arabische Speule vaan 1957: 'n 4-2 euverwinning op Libië. In 1960 plaotsde 't team ziech ouch veur de Olympische Speule. Mèt de Joegoslaaf Milan Kristić mós Tunesië ziech mèt de toplen goon mete; 'n 10-1 verlees tege Hongarije maakde dujelek tot 't dao nog neet ech veerdeg veur waor.
In de jaore die kaome góng 't ummer beter. In 1962 woort 't land daarde in d'n Africa Cup; in 1965, in eige land, woort zelfs de twiede plaots behaold. De twiede groete bleuj kaom ind jaore '70. In 1978 plaotsde Tunesië ziech veur 't iers veur 't WK. 't Kaom dao neet wijer es de grópsfaas; in die daog woort vaan Afrikaonse teams ouch koelek mie verwach.
In de jaore tachteg presteerde Tunesië neet väöl, meh midde jaore negenteg kaom 't trök. Op de Africa Cup vaan 1994 - hun ierste in 12 jaor - haolde 't land veur 't iers in jaore weer de finaal (boe-in 't verloor vaan Zuid-Afrika). Ouch waor 't land presint op de WK's vaan 1998 en 2002 - boe 't weer neet wijer kaom es de grópsfaas. In 2004 haolde Tunesië, aon de hand vaan de Fransen trainer Roger Lemerre en staarspeuler Hatem Trabelsi, zie groetste succes tot nog touw door in eige land kampioen vaan Afrika te weure. Rivaol Marokko woort heiveur in de finaal verslage. 't WK vaan 2006 brach gein bezunder gooj prestaties, al had me dao oonderhand wel op gehoop.
Naotot Lemerre in 2008 bij Tunesië weggóng, raakde 't nationaol team stuurloes. In de Africa Cup presteerde 't team neet bezunder väöl mie en veur WK's wis 't ziech al gaaroet neet te plaotse. Pas tegen 't ind vaan de jaore '10 kaom dao veraandering in. Op 't WK vaan 2018 en 2022 waor Tunesië weer debij en op 't Afrikaons kampioensjap vaan 2019 kaom 't tot de veerde plaots.