Lionel Messi
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Lionel Andrés Messi (Rosario, 24 juni 1987) is 'nen Argentijnse voetballer, gemeinelek speulend in d'n aonval. Heer späölt bij Paris Saint-Germain en is op 't memint aonveurder vaan 't Argentijns voetbalèlftal, boe heer mèt 151 opreup en 76 gole (per augustus 2021) recordinternational en topscoorder veur is. Heer woort bekind es staarspeuler vaan FC Barcelona, boe heer tot 2021 voetbalde. Messi woort jaorelaank gezeen es de bèste voetballer vaan de wereld, en gelt es eine vaan de groetste voetballers oets.
Heer woort gebore in de provincie Santa Fe meh verhuisde in 2000 mèt zien elders nao Barcelona, boe heer bij de jäög góng speule. Vaanaof 2003 späölden 'r e jaor in 't C-èlftal, tenao nog e jaor in 't B-èlftal en sinds 2005 is heer oonaofgebroke veur 't ierste oetgekoume. Dao oontwikkelden 'r ziech tot eine vaan de bèste voetballers vaan de wereld en nao de meinig vaan väöl lui eine vaan de bèste oets. In zien 201 wèdstrije (per 14 februari 2012) scoorde heer 147 goale. De lèste jaore geit dat gemiddelde ouch sterk umhoeg. Um zien techniek, die veural op balgeveul rös, wie ouch zien nationaliteit en zien gering lengde, weurt heer dèks mèt Diego Maradona vergeleke, dee in häöm zienen opvolger zuut. Heer woort in 2008 genomineerd veur d'n awwe Gouwe Bal en de FIFA-pries veur speuler vaan 't jaor, en won de Gouwe Bal in 2009. In zoewel 2010 es 2011 won heer de nuie Gouwe Bal, wie ouch de pries veur bèste speuler vaan de UEFA in 2011. Heer kaom sinds 2005 151 kier oet veur 't nationaol team en scoorde dao 76 kier.
Mèt 't nationaol èlftal lökden 't Messi evels neet 'nen internationaole pries te pakke. Naotot 'r in de finaal vaan de Copa América 2016 'n beslissende penantie neve sjoot, besloot heer gans te stoppe mèt interlandvoetbal. Op dees beslissing kaom heer evels gaw trök, en in 2021 won heer esnog de Copa América.
De band tösse Messi en FC Barcelona begós roond 2020 te verzoere. Wie de prestaties vaan 't verawwerend èlftal tröklepe, begós me de selectie te sanere en hoeger eise te stèlle. Messi dreigde diverse kiere mèt vertrèkke, oonder mie umtot ziene vrund Luis Suárez weggóng. Daobij góng 't de club ouch financieel minder, zoetot Messi ouch zakelek in conflik kaom: de club kós zien extreem hoeg salaris neet mie betaole. In augustus 2021 woort dujelek tot Messi zie contrak neet zouw verlènge en bij Paris Saint-Germain zouw wijergoon.
Dit artikel is e sjtumpke. De kans Wikipedia helpe door 't aan te völle