Saoedisch hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Saoedisch hierevoetbalèlftal (bijgenaomp الأخضر al-ʾaḫḍar 'de greune', of الصقور الخضر aṣ-ṣuqūru l-ʾaḫḍar 'de greun valke') vertreujt Saoedi-Arabië in internationaol voetbalmatche. 't Team huurt bij de betere vaan Azië (wat al-evel neet 't sterkste voetbalcontinent is) en presteert in 't gemein good in de Asia Cup. Ouch heet 't sinds 1994 diverse kiere aon 't WK mètgedoon, mèt wisselend succes.
Historie bewirk
't Nationaol team vaan Saoedi-Arabië woort rillatief laat gevörmp. In 1951 späölde veur 't iers 'n officieus nationaol èlftal. In 1956 woort de nationaole voetbalboond opgeriech. E jaor later deeg 't team mèt aon de Pan-Arabische Speule, 'ne match tege Libanon (1-1) waor 't ierste officieel voetbalspeul vaan 't èlftal.
De ierste jaore had 't voetbal gein hoeg prioriteit. Saoedi-Arabië waor gei lid vaan 't AFC en trainers waore veural Egyptenere. Vaanaof 1975 veraanderde dat allemaol. 't Rezjiem begós zien oliemieljoene in de voetbalsport te steke en trok 'n väölheid aon boetelandse trainers aon, te beginne mèt d'n Hongaar Ferenc Puskás. Sinds 1980 waoren 't veural Braziliaone die 't team trainde. In 1984 sjreef Saoedi-Arabië ziech veur 't iers in veur de Asia Cup; 't land woort direk kampioen. In de jaore die volgde wis Saoedi-Arabië 't Aziatisch voetbal gans te dominere: in 1988 en 1996 woorte ze obbenuits kampioen, in 1992 en 2000 indegde ze es twiede. In 1994 waor 't land veur 't iers presint op e Wereldkampioensjap. Oondaanks de vrij sterke tegestand - Belsj, Marokko en Nederland - gónge ze es twiede door nao de achste finaal. Ouch in 1998 deeg 't team mèt. Op 't WK vaan 2002 waor evels 't verval begós. 't Land verloor alle matche, boe-oonder eine tege Duitsland mèt 8-0. Ouch in Azië maakde ze minder indrök. De tegestand waor sterker gewore en de twiede plaots op de Asia Cup vaan 2007 waor 'nen oetsjeter. In 2018 plaotsde ze ziech, nao twie kier aofwezegheid, weer veur e WK, wat ze in 2022 herhaolde.