Canadees hierevoetbalèlftal
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
't Canadees hierevoetbalèlftal (bijnaom The Maple Leafs of The Canucks (Ingels); Les Rouges (Frans)) vertreujt Canada in internationaol voetbalmatche. Voetbal is al 'nen iew geinen ech groete sport mie in Canada, boe ieshockey en Canadees voetbal väöl mie de aondach opeise, en Canada is ouch binne Noord-Amerika gei groet voetballand. Toch heet 't team op e paar meminte gepiek en bezunder rizzeltaote gehaold.
Historie bewirk
Es Brits dominion kraog Canada al vreug mèt de voetbalsport te make. Al in 1877 woort d'n ierste voetbalboond opgeriech veur e deil vaan de kelonie. Al in 1885 späölde 'n officieus nationaol èlftal tege 'n èlftal vaan Amerikaone (1-0 wins). Drei jaor later góng 'n aander team op tournee door de Britse eilen.
Op de Olympische Speule vaan 1904 in Saint-Louis späölde voetbalclub Galt F.C. de rol vaan Canadees nationaol èlftal. Aon 't voetbaltoernooj dege wijer allein twie Amerikaonse clubs mèt; Galt versloog ze allebei en zoedoende pakde Canada de gouwe medalje in 't voetbal.
De ierste officieel erkinde match vaan 't Canadees èlftal waor in 1924, wie 't team op tournee góng nao Australië. 'ne Match tegen 't gasland woort mèt 3-2 verlore. 't Jaor dao-op späölde ze hun ierste officieel matche tege de VS, hunne awwe sportrivaol (1-0 wins in Montréal, 6-1 verlees in New York). In 1928 trok Canada ziech, in naovolging vaan de Britse team, ziech trök oet de FIFA. 't Land sjreef ziech dus veur de ierste WK's neet in. In 1946 kaome ze weer trök, meh pas in 1957 dege ze veur 't iers 'n (succesloes) poging veur ziech veur 't WK te kwalificere. In 1962 trok 't land ziech trök en in 1966 sjreve ze ziech gaaroet neet in.
Vaanaof de jaore '70 woort get opgebouwd. In 1977 en 1981 haolde Canada de kwartfinales vaan de CONCACAF Cup, die ze in 1985 - wie 't toernooj in eige land waor - zelfs veur 't iers wonne. In 1986 deeg 't team daobij veur d'n ierste kier mèt aon e Wereldkampioensjap, al maakde ze mèt drei kier verlere geinen indrök.
In de jaore die volgde had Canada in Noord-Amerika wisselende rizzeltaote, boe-oonder nog e Noord-Amerikaons kampioensjap in 2000. Wereldwied zakden 't land deep weg: WK's woorte noets bereik en op de FIFA-Wereldraanklies bezat 't land op zie deepdepunt (in 2014) de 122e plaots. Roond 2020 begós, vrij oonverwach, 'ne nuie bleujtied. Op de CONCACAF Cup vaan 2021 woort Canada veerde (de hoegste positie in jaore), meh veural indrökwèkkend waor de kwalificatierunde veur 't WK vaan 2022. 't Team sloot de kwalificatie es ierste aof, mèt oonder mie toeseuverwinninge op de Vereinegde Staote en Mexico.