Tippelder

Dit artikel is gesjreve (of begós) in 't Ieëpesj. Laes hie wie v'r mit de versjillende saorte Limburgs ómgaon.

---

Vakwerkboerderi-j i Tippelder

Tippelder (Nederlands: Diependal) is e gehucht van Ieëpe in 't heuvelland van Zuid-Limburg in de gemingte Gulpe-Wittem. 't gehucht is gelaege in 'n dal an de voot van d'r Óndersjte bösj aan 'ne waeg dae in 'ne groete boch lupt tösje de Plaat en Terziet. Dik genog wet 't es 'n deel va Terziet besjouwd. Versjpreid aan de Diependalse waeg lient 'n 15 häöf en hoezer, oe-in óngevaer 40 luuj wonne. D'r naam kump va deep dal.

Waarsjienlik is 't gehucht ontsjtange vanoet 'ne middeleeuwse haof Diependal.

Bezeenswaerdig

Der Óndersjte bösj bie Tippelder en Terziet

• Vakwerkhäöf en hoezer
• Boom- en veldkruutser
• 'n Kapel gewijd an de heilige Genoveva, opgericht nao der Tweje Weltkreeg oet dankbaarheid, dat Diependal gesjpaard is geblaeve.
• De Óndersjte bösj en de Baoveste bösj, beheerd durch Sjtaatsbosbeheer
• Haol waeg, deune hègke en grave