Lummel

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Lummel

Lummel (Nederlands Limmel) is 'n wiek vaan Mestreech, mèt e redelek dörps karakter. 't Is gelege in 't noorde vaan Mestreech. Tot 1920 hoort Lummel bij de gemeinte Meerse. In 1840 woende dao 372 lui in ca 72 hoezer. Bij d'n aonlèk vaan 't spoor van Mestreech nao Remun in 1850 woort de parochie Lummel (die oonder mie Nazareth, Wiekerpoort, en 't Vrouweveld umvatde) in twieje gedeild. 't Dörp had toen 'n eige statie, statie Mariënwaard. Nao de vesteging vaan 't glaasfebrik en steinfebrik wèrkde hei in 1911 mie es 2000 arbeiders en tèlde Lummel mie es 40 kaffees.

In Lummel ligk ouch 'n sluis in 't Julianakanaal.

Straote mèt biebelse naome

Dörpskern vaan Lummel

In 1955 woort 'n ganse nui wiek gebouwd. Wat opvèlt is tot de straotnaome dèks aofgeleid zien vaan biebelse naome. Dit nao aanleiing vaan de naome vaan de twie kestiele. In de zeventienden iew heet d'n eigeneer vaan kestiel Jeruzalem deze naom aon zie kestiel gegeve nao e bezeuk aon 't Heileg Land. D'n eigeneer vaan 't aander kestiel kós toen neet achterblieve en dee neumde zie kestiel toen "Bethlehem". Door de gemeinteraod woort in 1955 beslote um de nui straote ouch biebelse naome te geve.

Romeinsen tied

In de winter vaan 1880-1881 woort in 't veurmaoleg gehuch de Steinstraot (Nazareth) 'n aontal Romeinse graver oontdèk, boe-in hoonderde urne laoge.

Kestiel Jeruzalem

Bezeensweerdeg

In de wiek ligk de Hoeger Hotèlsjaol Mestreech, in 't kestiel vaan Lummel (kestiel Bethlehem). Wijer ligk hei kestiel Jeruzalem. De neogotische kèrk is gewijd aon Sint-Jan-d'n-Duiper.

Kestiel Bethlehem of de Hoeger Hotèlsjaol Mestreech

Vereineginge

Lummel heet e riek vereinegingsleve, mèt 'n eige famfaar, foetbalclub, toneelvereiniging, en mierder zaankkoere.

Extern linke

• Website vaan Lummel
• Website euver Lummel