Hare (Mestreech)

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Hares, es te dit dialek sjpriks.

---

Hare (Borgharen) Gewaeze gemeinte in Nederlandj
Gevörmp	1178
Opgehaeve	1970
Opgegange in	Mestreech
Provincie	Nederlands Limburg
Hoofplaats	Hare
Opperflaakde (bie opluffing)	2,84 km²
– daovan water:	0,13 km²
Inwoeners (kort veur opluffing)	1.316
– deechde:	486/km²
Lies van börgemeisters

Hare (dèks ouch es Haare gesjreve; Nederlands Borgharen) is e dörp ten noorde vaan Mestreech. In 1970 is 't bij de gemeinte Mestreech gevoog. In Hare steit 't Kestiel van Haare. 't Is dèks in 't nuits gewees umtot 't eder jaor weer oonder water stoont bij hoeg water in de Maos. Erg bekind is ouch 't mannekoer Sint Gregorius.

Kestiel vaan Hare

Insignes

Op 19 juli 1890 kraog de gemeinte Hare e waope touwbedeild, wat ziech es volg liet umsjrieve:

In lazuur (blauw) d'n H. Martinus mèt geziech en han in natuurleke kleur, gekleid in waoperok, mantel en helmstökker vaan zèlver (wit) en wijer mèt helm en nimbus vaan zèlver, hawwend in de rechterhand e zweerd vaan zèlver, gezete op e peerd vaan sabel (zwart), mèt hoofstèl, teugele, dèkreme en hove vaan zèlver; neve 't peerd löp 'ne naakse bedeleer, mèt 'ne reem vaan sabel um de lendene; alles gezat op e terras vaan sinopel (greun), op de veurgroond boevaan e sjuinsrechs geriech (veur de beziener sjuinslinks) sjèlde is gezat, vaan zèlver belaoje mèt veer dweersbelk vaan keel.

Sint Maarten waor tot 1979 de parochieheilege; 't zegel is vaan 't geslach Vaan Hare, wat tot 1380 't dörp bestuurde. Ouch op aw zegele is d'n heilege in combinatie mèt 't femiliewaope te zien.

Beziensweerdeghede

't Kestiel Hare is gestiech in de vieftienden iew en tot en mèt d'n achtienden iew versjèllende kiere um- en oetgebouwd. Aon de noordkant gief 't nog e poortgebouw vaan Pierre Cuypers. De kèrk vaan Hare is gebouwd in 1888 vaan brikke. 't Betröf 'n neogotische, einbeukege kruuskèrk. D'n arsjitek waor Johan Kayser. Tot 1979 waor ze gewijd aon Sint Maarten, daonao aan de heilige Cornelius. Tot de parochie huurt ouch 't dörp Ittere.

Historie

De hierlekheid Hare is bekind sinds 1178. Wie bove gezag heersde tot 1380 't geslach vaan Hare over 't dörp, wat toen 'n vrij hierlekheid vörmde; tenao kaom 't oonder Braobant. Sinds 1650 veel Hare oonder Valkeberg. In de zèstienden of zeventienden iew woort hei 'n enorm peerdsgraaf aongelag; dees peerd kinne zien gesneuveld bij 't Belag vaan Mestreech in 1632 of bij de Fransen inval in 1673. In 1970 woort de gemeinte Hare opgeheve en aon Mestreech touwgeveug, tegeliek mèt Amie, Hier en Ittere. Door zien lieg ligking kort aon de Maosbèdding heet 't dörp, zjus wie Ittere, dèks te make gehad mèt euverstruiminge. Naotot dat twie winters achterein waor gebeurd (december 1993 en jannewarie 1995), besloot me 'nen diek um 't dörp te lègke. De weeg vaan Mestreech nao Hare löp evels nog wel dèks oonder, zoetot 't dörp 's winters wel ins geïsoleerd kump te ligke.

Historische inwoenertalle

Jaor Aontal Greuj (gans Limbörg) 1830 393 -- 1840 431 +9,7% (+5,6%) 1849 499 +15,8% (+4,3%) 1859 560 +12,2% (+4,4%) 1869 645 +15,2% (+4,5%) 1879 723 +12,2% (+7,0%) 1889 645 -10.8% (+6,8%) 1899 732 +13,5% (+10,2%)

Jaor Aontal Greuj (gans Limbörg) 1909 797 +8,9% (+17,8%) 1920 970 +21,7% (+32,6%) 1930 1.121 +15,6% (+25,1%) 1947 1.161 +3,6% (+24,2%) 1956 1.226 +5,6% (+27,3%) 1960 1.316 +7,3% (+7,4%) 1970 1.664 +26,4%

Opmerking

• Inwoenertal vaan 1970 op 't memint vaan opluffing. T'r vergelieking: De bevolking vaan gans Limbörg greujde tösse 1960 en 1971 mèt 13,4%.

Rillatief oontwikkeling vaan 1830 tot 1971

(v₁₈₃₀=100)

Greun: Gemeinte Hare
Blauw: Provincie Limbörg

Extern linke

• Kestiel vaan Hare
• Mannekoer Sint Gregorius Haare