Wiek (buurt)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

'n Wiek (mèt sjleiptoan oetgesjproke) ies 'n gedeilte van 'n sjtad of van 'n groat dörp, dat ruumtelik gezeen min of miè 'n aafgesjlote gehiel vörmp. 'n Buurt kèn 't zelfde zin es 'n wiek, meh ouch 'n gedeilte devan.

Zoa höbs se in 'n sjtad: 't centrum (de binnesjtad) en de woonwiek.
Bie 't zeuke van name veur nuuj sjtraote zint väöl gemeintes d'r toe euvergegange woonwieke ónder te verdeile in buurte mèt 'n bepaald thema. Zoa óntsjtónge bv. de componistewiek, de blomebuurt, de buurt van keuninge en prinse, de pesjtoarsbuurt en de burgemeistersjwiek.
In 'n sjtudentewiek zint weuninge en appartemente speciaal veur sjtudente geboewd. Sjieke hoezer liegke dèks in 'n villawiek. 'n Achterbuurt en 'n krottewiek bevinge ziech meistal aan de rand van 'n plaats.
Es café's, eethoezer, snackbars, theatersj en dancings bie-ein liegke höbs se 'n oetgaonswiek.
De grachtegordel, 't zakecentrum en 'n industrieterrein zint ouch wieke in 'n groater plaats mèt eder hun eige inriechting en functie.

De naam van 'n oud gedeilte van de sjtad Mestreech, aan de andere kant van de Maas, ies Wiek.
'n Groate nuuj wiek oet 't ing van de 20e ièw in Mestreech hèt Randwiek.