Blierik

Dit artikel is gesjreve (of begós) in 't Blieriks. Laes hie wie v'r mit de versjillende saorte Limburgs ómgaon.

---

Blierik (Nederlands: Blerick) is 'n kern van de Nederlands-Limburgse gemeinte Venlo, die in taegestèlling tot de hoofplaats en mèt D'n Bokent (Boekend) en Houblierik (Hout-Blerick) aan de weskant van de Maas leet. 't Haet óngeveer 28.000 inwoeners.

Historie

Blierik bestónd in den Romeinsen tied as neerzètting mèt de naam Blariacum, aan d'n heerweeg van Mosae Trajectum naor Noviomagus. Sins de óntwikkeling van Venlo tot stad (dees plaats kreeg stadsrechte in 1343) waas Blierik sterk op Venlo gerich. Door de vuule belegeringe die Venlo mós doorstaon, rakde Blierik, neet wie Venlo beschermp door walmör, dök verwoes door oorlogsgeweld. Heejdoor heet de plaats weinig alde monumente. Blierik is daodoor waal altied van groëte militaire beteikenis gewees: al in 1450 woort heej un fort gebouwd. In 1643 woort dit vervange door 't Sint-Michaelsfort, gebouwd door de Spanjaarde. In 1831 volgde Fort Leopold, gebouwd door de Belze opstandelinge. Op dees grónd steit sinds 1913 de Frederik Hendrik-kazerne. Blierik waas tot aan de Franse vereuvering in 1794 'n ónaafhankelik kerspel, wat neve Blierik-dörp ouk Houblierik en D'n Bokent umvatte. De ander kerne woorde rotte geneump. Blierik huurde in 't Hertigdóm Gelder, wie Venlo. Nao de Spaonse Successieoorlog kwaam Venlo in Nederlandse hand en kwaam Blierik aan Pruse. De res kwaam bovendien aan Oosteriek.

In 1794 kwame de Franse bezètters mèt 'n gemeintelike herindeiling: alle kleine gemeintes woorde opgeheve en samegevoeg. Heejdoor kwaam 't ald kerspel Blierik in de gemeinte Bree te ligge, same mèt Bree en Baolder. Dees situatie woort nao de Franse bezètting gecontinueerd. Maar de gemeinte waas sterk verdeild umdet Blierik zich steeds mier verstedelikde en op Venlo richde, tewijl Bree en Baolder landelikke plaatse bleve. 't Dörp kwaam aan de spoorliene van Venlo naor Eindhove en van Venlo naor Nimwege te ligge en kreeg in 1869 'n eige station. In 1876 vestigde de zusters van de Ónbevlekde Óntvangenis zich in Blierik. Ze zoele decennias lank eure stempel op 't Blieriks dörpsleve duje. In de twintigste iew begós Venlo poginge te doon um Blierik te annexere, iets wao de Blierikse bevolking en de Breese raod sterk taege ware. Nao mislökde poginge in 1911 en 1929 woort oeteindelik in 1940 de euvergang van Bree nao Venlo doorgeveurd. Ouk Houblierik en D'n Bokent woorde heejbeej geannexeerd. Op 3 december 1944 woort Blierik bevrijd door de Geallieerde.

Wieke

Houblierik en D'n Bokent waere as zelfstandige kerne gezeen. Blierik zelf luuet zich ónderverdeile in:

• Tuindörp
  • Dörp/Centrum
  • Hazekamp
  • Sint-Annakamp
  • Vastelaovendkamp
  • Smeliëkamp
  • Ubrook
  • Zonneveld
• Klingerberg
• Vossener

De wiek Tuindörp is officieel, maar wuurt in neet-amtelike situaties weinig gebroek. Veur de ónderwieke van Tuindörp gelt 't umgekierde.

Taol

't Blieriks liek vuul op 't Venloos.

Gebore in Blierik

• Mathieu Cordang, fietserenner
• Rick Hoogendorp, vootballer