Groeët Boller

Dit artikel is gesjreve (of begós) in 't Blieriks. Laes hie wie v'r mit de versjillende saorte Limburgs ómgaon.

---

Groeët Boller is 'n wiek en industrieterrein van Blierik in de gemeinte Venlo.

't Bedriefsterrein ligk ten noorde van 't dörp, ingeklemp tösse d'n Indhaovesewaeg (N556) en de spaorlien Venlo-Indhaove, de A73, A67 en de reveer de Maas. Ten noordweste van de wiek ligk 't gehuch Santfort en 't Venlose bedriefsterrein Trade Port West. Aan de noordkank grens Groeët Boller aan de Grevorstse buurtschap Raajind. Aan d'n angere kank van de reveer ligk de buurtschap Genuue en in 't zuje grens dit bedriefsterrein aan de Blierikse wieke Ubrook, Smeliëkamp en Klingerberg. Ten weste, doeënbeej d'n oprit Venlo-Wes ligk 't gehuch Wielder.

In Groeët Boller woeëne 15 minse. 't Is 'n typisch nao-oorlogs bedriefsterrein mit kleine en middelgroeëte óngerneminge. Vul logistieke bedrieve zien inmiddels verhoes nao 't gróttere bedriefsterrein Venlo Trade Port. Aan de Maas guf 't watersportfaciliteite.

Naamgaeving

Naamgaever van dit industrieterrein is Kestiel Boller (wat ouk wal ens Boerlo of Boirlo woort geneump). Dae naam geit truuk op 'ne zekere Reynken van Boerle (1369) dae aafkomstig waas oet 'n ald Gelders geslach. 't Kestiel woort in 1957 gesloop.