Geloë

Dit artikel is gesjreve (of begós) in 't Belvends. Laes hie wie v'r mit de versjillende saorte Limburgs ómgaon.

---

'n Woeëning aan de Tegelsewaeg 13, hook Kapelwaeg

Geloeë (Nederlands: Geloo) is 'n buurtsjap en wiek van Belvend in de gemeinte Venlo. De wiek van 9,7 km² haet óngevier 240 inwoeëners. Geloeë ligk get ten naordoeëste van 't dörp Belvend, ingeklemp tössen 't bedriefsterrein Geloërveld en de A73. Ten naordweste van de wiek ligk 't kèrkdörp Sjteil en ten naordoeëste 't gehuch De Leimhors.

Naamgaeving

De naam Geloeë (Geloo) is 'n plaatsbepaling en geit truuk op *lo (aope plaats in de bös) en 't Aad-Limburgse lidwaord ge-. De naam woort veur 't iers gedocumenteerd in 1407, wie de buurtsjap Ghen Loee woort geneump. In 1613 sjreef me Aan gen Lohe en in 1835 Geloo.

't Kapelke van Geloeë

In de 17e ieëw woort in Geloeë 'n kapel gebouwd ter iere van Slevevrouw Hölp in Noeëd. Wie in 1863 'n sjpaorlien woort aangelag en 't tracé euver de plaats van de kapel leep, woort zeej gesjloop. In 1868 kwaam 'n niej kapel gereid. Dees bevatde nog de gevelsjtein van de oersjpronkelike kapel. 't 17e-ieëwse beeld woort dao-in geplaats achter 'n tralievinster. Ouch waar dao 'n chronogram te laeze: Ik ben gestICht hIer In het VeLD, Door P.J. CruIJsen, pastoor in BeLfeLD, wat 1868 oplevert.

Dees klein kapel woort in 1938 aafgebraoke en vervange door 'n groeëter kapel die me baeter kós betraeje. In 1943 woort de kèrk door 'n bombardement verinneweerd, aevel 't Mariabeeld waar sjlechs leech besjadig. In 1946 kwaam 'n niej kapel gereid mèt nege kèrkbanke.

't Höltere beeldje woort in 1977 gesjtaole, maar in 1980 truukgevónge en truukgeplaats. 'n Kopie van det beeld sjteit in de Sint-Urbanuskèrk van Belvend. Ouch vandaag de daag weite baevaartgengers 't kapelke van Slevevrouw in Geloeë te vinge.

Extern linke

• Toponieme van Belvend
• Website Visit Noord-Limburg