Schandele

Dit artikel is gesjreve (of begós) in 't Veldes. Laes hie wie v'r mit de versjillende saorte Limburgs ómgaon.

---

'n Boerderie in Schandele

Schandele (Nederlands: Schandelo) is 'n buurtschap van Velde in de gemeinte Venlo in Nederlands Limburg. Schandele leet tösse 't Prusische stedje Straole, 't gehuch De Hasselderhei en 't Zwart Water, 'n neteurgebeed tösse Velde en Venlo. Zeej besteit oet inkel boerderieje en woeëninge en haet óngevier 250 inwoeëners.

Naamgaeving

De naam ván de buurtschap is vánaaf 1377 gedocumenteerd as Schanle. Me dink dát dae naam get te make haet mit schand of slech en is samegesteld mit achterveugsel *lo (aope plats in 't bós), mar heejveur óntbraeke concrete aanwiezinge. 't Is vuuel waarschienliker dát hae truukgeit op *scan, waat schoeën of vreej van drek beteikent. De -d- as ingeveugde klank is vreej niej en woort pas rónd 1750 gedocumenteerd.

De inwoeëners van Schandele nump me Schandelse.

Geschiedenis

Schandele waas al bewoeënd in de Romeinsen tied en de middelieëwe. In 1975 woorte reste van 'n moor ván 'ne Romeinse villa bloeëtgelag en ok 'n aantal graafheuvels oet daen tied. 't Is aevel neet dutelik of 't gebeed permanent bewoeënd waas gewaes. Dát dao gen minse mier woeënde naodát de Romeine vertrokke, is zaeker neet oet te sloete.

In d'n Twieëde Waereldoorlog waas Schandele aeve ván strategisch belank. Umdát 't vleegveld op de Groeëte Hei 't risiko laep gebombardeerd te waere, mós 'n Schandels nepvleegveld de aandach ván de geallieerde trekke. Ech vuuel baat haet dát vleegveld euveriges neet gehad, want de Fliegerhorst op de hei woort in 1944 mar leefs vaer kier gebombardeerd. Sommige restante zien nog altied zichbaar.

In Schandele leet 'n Mariakapel oet 1923, op de plats van 'n vieftiende-ieëwse kapel en 'n Sint Jozefkapelke. In 't gebeed guf 't vaerder 'n aantal alde boerderieje. De meiste woorte gebouwd rónd 1800.

Trivia

• Schandele kump veur in 't bekinde leed As de sterre dao baove straole van Frans Boermans.

Kiek ok

• Sjandele in Haerle

Extern links

• Buurtvereiniging van Schandele
• Webpagina euver de Romeinse villa van Schandele
• Webpagina euver 't vleegveld van Schandele