Boleberg

Dit artikel is gesjreve (of begós) in 't Belvends. Laes hie wie v'r mit de versjillende saorte Limburgs ómgaon.

---

Boleberg (Nederlands: Bolenberg) is 'n wiek in Belvend in de gemeinte Venlo. De relatief nuuj wiek ligk ingeklemp tösse 't dörp en de A73. 't Is e greun en landelik gebeed. De wiek haet tieën inwoeëners.

Naamgaeving

De naam Boleberg geit truuk op e landgood det vanaaf 1726 gedocumenteerd waar es Aen den Bollenbergh. Dinkelik haet de topografische naam get te make mit 'nen heuvel (< bol). Det is good meugelik, want aan de Maas, neet wied van 't landgood, ligke reveerdune. De naam Bolleberg kump ouch veur beej Pötbrook.

Gesjiedenis

Landgood Boleberg woort in de achtieënde ieëw versjillende kiere verkoch. In 1726, wie de naam veur 't iers in e officieel document woort vermeld, woort 't grónksjtök door 'n zekere familie Janssen te koup aangebaoje, veur de mater familias (de aadste moder van 't gezin) te verzörge. In 1740 woort 't nog ens verkoch door de eigenaresse aan eure zjwaoger. In dees verkoupakte sjtóng det 't landgood dreej Gelderse mörge groeët waar en beej Belfelt huurde.

Extern linke

• Toponieme van Belfeld