Sjtókkem

Dit artikel is gesjreve (of begós) in 't Wieldesj. Laes hie wie v'r mit de versjillende saorte Limburgs ómgaon.

---

Dit artikel geit uuëver 't gehuch bie Wielder; vuuër de plaatsj in Belsj, zuug: Stokkem.

---

Waegkruus in Sjtókkem

Sjtókkem (Nederlands: Stokhem) is 'n naobersjap of ei gehuch van Wielder in de gemèngte Gölpe-Wittem in 't dal van de Guuël in Zuid-Limburg. Sjtok beteikent bienao zieëker; sjtam, familie of verzameling, dink mer ins aa'ne sjtok bieije,'ne sjtok-vuuërraod of 'ne sjtok kate b.v. 't kaatsjpel, "Sjtöksjke rape". 't Achterveugsel hem wies nao heim (heim)hoes of plaatsj. Ouwer sjriefwies zunt: Stokkum, in 1399 Stochem, in 1840 Stockem.

Aan de dörpsjtraot richting de baende langs de Guuël liek ei aantal vakwerkhoezer. In gans Sjtókkem bevinge zich ongevaer 75 hoezer en häöf. Middenin de naobersjap, aan 'ne driejsprunk sjteit 'n verseerd sjmeediezere waegkruuts mèt crucifix en 2 ander hèlligebeelde (Maria en Johannes de Evangelist) mèt 'ne Duutsje teks: "SO HAT GOTT DIE WELT GELIEBT DAS ER SEINEN SOHN DAHIN GAB 1886".
In de buurt van 't waegkruuts sjteit langs d'r waeg 'n waterpöthuuske. In 1959 is de originele boew aafgebraoke, d'r pöt bleef in tact. In 2015 woeët ze opnuuj opgetrokke in mergel.
Aan d'r voot van d'r achtieën procent sjtiele Doewe man, ('ne waeg, dae nao Berghäöf löpt), sjteit 'n modern Maria van Banneux-kapel. Dees kapel is in 1960 tot sjtand gekómme oet de belofte die de inwoeëners van Sjtokhem gedao höbbe in d'r sjuilkelder, vuuër d'r gówwe aafloup van d'r aorlog. Op de helling van d´r Doewe man liekt d'r wiengaard Sjtokhemer wingerd.