Maasgoew

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Brachs, es te dit dialek sjpriks.

---

Gemeinte Maasgoew (Maasgouw)
Provincie	Limburg
Hoofplaats	Hael en Brach
Börgemeister (lies)	Stef Strous (PvdA)
Opperflaakde – daovan water	58,02 km² 12,21 km²
Inwoeners – deechde:	24.243 (1-4-2011) 529/km²

De Maasgoew (Nederlands Maasgouw) is 'n gemeinte in Nederlands Limburg, mèt (1 augustus 2006) 24.517 inwoeners en 'n oppervlak vaan 58,12 km² (daovaan 11,65 km² water). De gemeinte umvat de plaotse:

• De Baek (Brachterbeek)
• Bieëgdje (Beegden)
• Brach (Maasbracht)
• Hael (Heel)
• De Laak (Laak)
• Lin (Linne)
• G'n Oea (Ohé)
• Oeazje (Osen)
• Panhael (Panheel)
• Pol
• Staeveswaert (Stevensweert)
• Toear (Thorn)
• Wèssem (Wessem).

De Maasgoew is oontstande op 1 januari 2007 oet 'n fusie vaan de aw gemeintes Brach, Hael en Toear. Planne veur 'n reductie vaan 't aontal gemeintes in Midde-Limburg waore d'r al jaorelaank. Heel en veural Toear waore te klein um es gemeinte good te kinne functionere. Sins kort höbbe gemeintes inspraak in de gemeinteleke herindeilinge; in dit kader kaome dees drei gemeintes mèt hun plan veur fusie. De naom Maasgoew woort op 15 november 2005 gekoze es rifferentie nao d'n awwe Maasgoew in 't riek vaan Sjarel de Groete, dee väöl groeter waor ('t besloog oongeveer de modern provincie Nederlands Limburg) en tot oongeveer 900 bestande heet.

In de Twiede Kamer waor me aonvenkelek tege de fusie; veural de VVD zaog mier in 'n annexatie door Remun. Dit waor evels tege de wèl vaan de bevolking, die lever in 'n lendeleke gemeinte woende en op 12 juni 2006 detege demonstreerde. Oetindelek stumde zoewel de Twiede es de Ierste Kamer veur 't oorsprunkelek veurstèl, boemèt de gemeinte Maasgoew geformeerd kós weure. De inwoeners van de later gemeinte kóste op 22 november 2006, tegeliek mèt de verkezinge veur de Twiede Kamer, 'ne nuie gemeinteraod keze.

Externe link

• https://web.archive.org/web/20201204170239/https://maasgouw.nl/

51° 9' NB, 5° 53' OL