Toear

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Toears, es te dit dialek sjpriks.

---

Toear (op z'n Hollands: Thorn; daodoor ouch dèks Thoear gesjreve) is e stedsje in de Midde-Limburgse gemeinte Maasgoew mèt 2.392 inwoeners (1 jannewarie 2013). Häöre bijnaom is 't Wit Stedsje, vaanwege de witte mör die väöl hoezer in 't centrum höbbe. Toear ligk aon de Belzje grens, kortbij Kaesing.

Toear kort veur zien opheffing

Historie

Sjtraotbeeld

In de Romeinsen tied laog Toear in e zier moerassig gebeed. Aon de rand vaan dit moeras leep de hierbaon vaan Nijmege nao Mestreech. 't Stedsje zelf is aon 't eind vaan de tiende iew oonstande roond e benedictinessekloester. Dees abdij greujde in de Riddertied oet tot 'n stif, later zelfs tot e vorstedom, 't kleinste vaan 't Heileg Roems Riek. In 1354 kraog 't pläötske stadsrechte. Nao de Tachtegjaoregen Oorlog bleef 't bestoon, tot de Franse bezetting in 1797 'n ind draon maakde. Tösse 1830 en 1839 waor de plaots in Bèlzje han. Sins 1 januari 2007 maak Toear deil oet vaan de nui gemeinte Maasgoew, boe-in wijer nog Brach en Hael opgónge. Op 't memint vaan häör opheffing waor de gemeinte Toear mèt 2.600 inwoeners, 'n oppervlak vaan 6,60 km² en gein ander kerne es Toear zelf wiedoet de kleinste gemeinte van Nederlands Limburg. In 2013 had 't stedsje bekans 2.400 inwoeners, wat beteikent dat de bevolking mèt zoeget twiehoonderd lui is aofgenome (7,8%).

Harmonieorkeste

Toear is internationaol bekind um 't hoesveste vaan twie op hoeg niveau speulende harmonieorkeste, boetösse 'n serieus rivaliteit besteit: de Koninklijke Harmonie (de "bök") en de Harmonie St.-Michaël (de "geite"). Dees twie orkeste bepaole 't gaans dörpsleve. In 1999 zien 't dörp en zien twie orkeste geportretteerd in de documentair Bokken en geiten vaan Hans Heijnen, dee gaans in 't Toears dialek gesproke is.

Persone

'ne Toearse dichter is Har Sniekers.

Fotogalerie

• 
• 
• 
• 
• 
• 
• 
• 
• 
• 
• 
• 
• 
• 
• 
  Toear aon de Maos en de Maosplasse
• 

Trivia

• In Toear vertèlle ze 't verhaol euver 't verzónke stedsje Vievere.

Extern linke

Commons: Category:Abdijkerk Thorn – Media gerelateerd aan dit óngerwerp

• 't Toear weblog
• Mie informatie euver de abdij en de abdijkèrk