Sippenake

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Sippenaker, es te dit dialek sjpriks.

---

Sippenake (Frans: Sippenaeken, Nederlands: Sippenaeken) ies 'n dörp in de gemeinte Blieberig (Nederlands: Blieberg; Duutsj: Bleyberg; Frans:Plombières) in de Belzje provincie Luuk. De meiste hoezer liegke in lintbeboewing aan de rue de Beusdael, die via Klein-Kuttinge (op de Nederlandse grens), nao kesjtièl Beusdael löp. D'r wone ca 200 luuj in Sippenake. Sippenake ies gelege aan de voot van de Beusdaler bösj (Bois de Beusdael) tösje weie en akkerlande. Nog get liègeraaf sjtruimp de Geul mèt väöl meandersj door de beemde. Hie bevingk ziech 'n groate camping en de grens mèt Zuud Limburg. 'n Paar kilomaeter wiejer liegke de Vielener bösj en de Malens bösj.

Sippenake mèt op de achtergrónd de Vielener bösj en de Malens bösj.

Buurtsjap

Kesjtieël Beusdael

• 'n Buurtsjap ies Beusdael, gelege bie 't château de Beusdael.

Bezeenswaerdig

• Einbeukig neo-kèrkske oet 1841 mèt róndbaogvènstere en 'ne sjpietse kopere kèrktore. Geboewd van baksjtein. In 't interieur bevinge ziech klassieke en barokelemente.
• Diverse gesjlote häöf en vakwerkhoezer.
• Op 't kèrkplein 'n waegkruus mèt crucifix en op diverse ander sjplietsinge waegkruzer.
• Haol waeg, deune hègke en grave in 't landsjap.
• Miede door 't Bois de Beusdael löp de grens van de gemeintes Voere en Plombières. Hie sjteit ouch 'n oorlogsmonument, dat herinnert aan de sjlachoffersj (bekans allenei oetgebroke Russische gevange soldaote) oet de Ièrsjte waereldoorlog, die de doad vónge aan 'ne tankeldraod dae door de Pruusje ónder sjtroum (2000 volt) waor gezat um te veurkómme dat Belzje de grens euverginge nao Nederland. Langs de gaanse grens tussje Belsj en Nederland waor d'r elektrische draod (Die Sperre in 't Duutsj) geplaatsjt. In ozze sjtrieëk waor dit iezere gerdien 28 kilomaeter lank en leep van 't Drielandepunt in Gemmenich tot aan de Maas. Graaf Joseph d'Oultremont, eigenaer van kesjtièl Beusdal, haet 't monumaent vlak nao de oorlog laote opriechte.

Dörpsvereiniginge

• Fanfare
• Sjötterie

Grensaafwieking van d'r elektrische draod.

---

De volgende sectie van dit artikel is gesjreve in 't Norbiks.

---

't Kesjtieël va Beusdaal, mae och kesjtieël Sinnich mit 't durp Teuve eeges en kesjtieël Altenbrouck (tussje Norbik en Voere) loge evvels an d'r hollendsje kaant van d'r Elektrische Draod. De adeleke bewoners va Sinnich en Altenbrouck lete zich bie 't oetbraeëke van d'r kreeg insjrieve in 't bevolkingsregister van de gemingde Norbik, o.m. op 't adres van de pastorie, en behole dus vrie baan nao 't neutrale Nederland en de res van de waelt.

Decor väör Limburgstalège film Krach

D'r kern va Sippenake en de landeleke umgaeving deende es decor vör d'r film Krach, dae in 't Limburgs gedriejd is, roond 1990. De plaatsjeleke harmonie sjpäölde ooch 'n rol. Regie en scenario waore in heng van Frouke Fokkema. Huub Stapel sjpäölde 'n hoofdrol.