Schiebroek

Schiebroek is 'n stadswiek vaan Rotterdam. 't Maak oonderdeil oet vaan 't stadsdeil Hillegersberg-Schiebroek. De wiek Schiebroek ligk in de gelieknaomege polder, dee oets 'n ambshierlekheid en later 'n gemeinte waor. Schiebroek bleef langen tied lendelek, meh verveursteidelekde in d'n twintegsten iew en woort in 1941 bij Rotterdam geveug.

Historie

Schiebroekse meule roond 1900 (breefkaart).

In Schiebroek weurt, mèt jaoknikkers, olie gewonne.

De naom Schiebroek liet ziech probleemloes verklaore es brook (moeras) aon de Schie. E groet deil vaan de middeliewe waor de wijen umtrèk nog moeras; op dit punt evels leep de Kleiweg, 'ne verhoegde weeg op 'ne zandrögk tösse de Schie en de Rotte. Hei vestegde ziech de ierste bewoeners. 't Umligkend land woort roond 1300 in cultuur gebrach. In 1590 woort Schiebroek e zelfstendeg amb oonder 't baljouwsjap Schieland.

Wie in de wij umgeving woort in Schiebroek in de zeventienden en achtienden iew op groete sjaol törf gestoke. Umtot me grundeg, tot op de kleilaog, aofgroof, kaom de bojem tot vief meter oonder de waterspegel te ligke. Vaanaof 1772 begós me de polder weer druug te lègke; aanders es veurheer waor dao noe 'ne sterke meulegaank veur nujeg.

In 1817 woort Schiebroek 'n gemeinte. Oondaank de zelfstendege status had de polder zier wieneg bebouwing. De bewoening concetreerde ziech veural (wie ummer) aon de Kleiweg, meh de nederzètting die dao oontstoont had gei dörps karakter en gein dörpse proporties. Pas tegen 't vaan de negentienden iew begós de gemeinte gestiedeg te greuje. Nao 1920 greujden 't zelfs explosief tot 'n gemeinte vaan e paar doezend inwoeners. Schiebroek had intösse (in 1908) ouch 'n statie gekrege aon de Hofpleinlijn. Dees statie is in 1955 umgeduip tot "Rotterdam Kleiweg". De gemeinte had sinds 1875 e raodhoes aon de Kleiweg, meh verhuisde in 1930 nao e nui gebouw in de polder, aon de Raadhuisstraat.^[3]

In 1941 woort de gemeinte Schiebroek, tegeliek mèt Hillegersberg, IJsselmonde en Overschie, opgeluf en aon Rotterdam touwgeveug. E deil góng nao Berkel en Rodenrijs. In 't deil vaan de polder wat veur de annexatie nog neet bebouwd waor, versjeen in de jaore 1950 e tuindörp.

De wiek Schiebroek umvat neet de ganse vreuger gemeinte Schiebroek, zelfs neet gans 't deil wat bij de oplufting nao Rotterdam góng. De Kleiweg en zien directe umgeving weurt gerekend tot Hillegersberg-Zuid, al heet dit stök noets bij de gemeinte Hillegersberg gehuurd.

Historische inwoenertalle

Jaor	Aontal	Greuj (gans Z-Holland)
1795	221^[4]	--
1830	220^[5]	-0,5%
1840	237^[6]	+7,7% (+9,6%)
1849	289^[7]	+21,9% (+7,1%)
1859	340^[8]	+17,6% (+9,5%)
1869	354^[9]	+4,1% (+11,5%)
1879	428^[10]	+20,9% (+16,8%)

Jaor	Aontal	Greuj (gans Z-Holland)
1889	385^[11]	-10,0% (+18,2%)
1899	516^[12]	+34,0% (+18,2%)
1909	655^[13]	+26,9% (+21,5%)
1920	756^[14]	+15,4% (+20,7%)
1930	3.533^[2]	+367,3% (+16,6%)
1941	8.030	+127,3%

Rillatief oontwikkeling vaan 1830 tot 1941

(logaritmische sjaol; x₁₈₃₀=100)

Greun: Gemeinte Schiebroek
Blauw: Provincie Zuid-Holland (tot aon de volkstèlling vaan 1947)

Waope

Op 16 december 1896 kraog Schiebroek vaan d'n Hoege Raod vaan Adel 't volgend waope touwgekind:

In goud 'n achpuntege staar vaan lazuur (blauw).

Dit is 'n variatie op 't waope vaan Kralingen. 't Geslach Van Kralingen had versjèllende bezittinge in Holland, en versjèllende Zuid-Hollandse gemeintewaopes tuine dees achpuntege staar daan ouch. De gemeinte Schiebroek hej 't waope liever mèt 'n kroen gezeen, meh d'n Hoege Raod weigerde dat te verliene umtot de kroen veurbehawwe waor aon stei die oonder 't ancien regime stumrech hadde gehad in de Staote. De Raod maakde ouch bezwoer tege e waope vaan 't Kralings typ, umtot de lienband tösse Schiebroek en Kralingen neet dudelek waor, meh stumde toch touw umtot de ierste gemeinte 't waope in 't verleie al had gedrage.^[15]

Bronne

Dit artikel is deils gebaseerd op, meh neet vertaold oet, 't corresponderend Nederlandstaoleg artikel, en wel in dees versie.

Rifferenties

Rotterdam: Sjtadsdeile, opgelufde gemeintes en dörpsgemeinsjappe
Centrum (Cool) \| Charlois (Heijplaat) \| Delfshaven (Oud- en Nieuw-Mathenesse) \| Feijenoord (Katendrecht) \| Hillegersberg-Schiebroek (Hillegersberg · Schiebroek · Terbregge) \| Hoek van Holland \| Hoogvliet \| IJsselmonde \| Kralingen-Crooswijk (Kralingen) \| Noord \| Overschie \| Pernis ('s-Gravenambacht) \| Prins Alexander (Kralingse Veer) \| Rozenburg (Blankenburg)

[vt30A-1] 1,0 ^1,1 ^1,2 Volkstèlling 1930 - Oppervlaakde en diechheid

[vt30-2] 2,0 ^2,1 Volkstèlling 1930

[3] Stadsarchief Rotterdam - Raadhuisstraat (Schiebroek)

[4] Volkstèlling 1795 - Holland

[5] Volkstèlling 1830

[6] Volkstèlling 1840 - Zuid-Holland

[7] Volkstèlling 1849 - Zuid-Holland

[8] Volkstèlling 1859

[9] Volkstèlling 1869

[10] Volkstèlling 1879 - Zuid-Holland

[11] Volkstèlling 1889 - Zuid-Holland

[12] Volkstèlling 1899 - Zuid-Holland

[13] Volkstèlling 1909 - Diechheid vaan de bevolking

[14] Volkstèlling 1920

[15] Heraldrywiki - Schiebroek

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]