Louis Beel

Dit artikel is gesjreve in 't Oeals. Ómdat 't plaatsgebónge is, maogs doe 't ómzètte nao 't Remunjs, es te dit dialek sjpriks.

---

Louis Joseph Maria Beel (Remunj, 12 april 1902 – Utrech, 11 fibberwarie 1977), waas 'ne Nederlandse ambtenaar en politicus veur de RKSP en later veur häöre opvolger de KVP. Van 1946 toet 1948 waas hae minister-president van 't Kabinet-Beel I en van 1958 toet 1959 van 't Kabinet-Beel II.

Louis Beel, Limburgse minister-president

Louis Beel waas de zoon van Theodor Antoon Louis Beel, veearts, en Anna Maria Allegonda Rutten. Sins 21-9-1926 getouwdj mit Henrica Gerardina Maria Josepha van der Meulen. Oet dit huwelik waerdje eine zoon en 3 dochters gebaore.

Opleiding en ambteleke carrière

Hae behaoldje in 1920 't diploma gymnasium-B aan 't Bisjoppelik Colleesj van Remunj. Hae waas daonao werkzaam op'pe gemeintesecretarie van'ne gemeinte Remunj. In 1924 waerdje hae sikkertaris van mgr. P.J.M. Gils, de eerste bissjoppelik insjpecteur van 't biezonjer katholiek leger ongerwies in Limburg. In det jaor sjreef Beel zich ouch in es rechtesjtudent aan'ne Roomsch-katholieke Universiteit van Nijmege.

In 1925 waerdje hae benumpdj toet ambtenaer aan'ne Provinciale Griffie van Euverijssel, naodet ein sollicitatie nao het sikkertarisambt van'ne gemeinte Deurne op nieks waas oetgeloupe. Nao 't behaole van 't doctoraalsexame rechte in 1928, waas hae vanaaf 1929 werkzaam biej de gemeintesikkertarie van Eindhove, sins 1934 es plaatsvervangendj gemeintesikkertaris. In 1935 promoveerdje hae toet doctor in'ne rechsgeleerdjheid op 't proofsjrif "Zelfbesjtuur of aafhankelikke decentralisatie?".

Toen Eindhove in 1942 eine NSB-burgemeister kreeg, noom Beel vriewillig ontsjlaag, en begos aan hoes een bureau veur besjtuursrech.

Weitensjappelikke carrière

Hae waas van 1949 tot 1951 hoogleraar in 't besjtuursrech en'ne besjtuurskunde aan'ne Roomsch-katholieke Universiteit van Nijmege. Hae waas ouch van 1950 toet 1951 veurzitter van 't Lanjelik Sociaal-Charitatief Centrum.

Polletieke carrière

Vanaaf 23 fibberwarie 1945 waas hae minister van Binnelandse Zake in 't Kabinet-Gerbrandy III en 't Kabinet-Schermerhorn/Drees. Van 3 juli 1946 toet 7 augustus 1948 waas hae minister-president van 't eerste Kabinet-Beel. Daonao waas Beel in 1948 en 1949 Hoge Vertegenwoordiger van'ne Kroon in Nederlands Oost-Indië.

Vanaaf 6 december 1951 waas hae opnuuj minister van Binnelandse Zake in 't Kabinet-Drees II en 't Kabinet-Drees III. Op 7 juli 1956 trooj hae aaf es minister om lid van'ne Commissie van Drie te waere, die op verzeuk van Keuningin Juliana en Prins Bernhard de waat later de Greet Hofmans-zaak zoew gaon heite, ging ongerzeuke. Op 21 november 1956 benumpdje de regering Beel toet Minister van Sjtaot.

Nao 't lidmaatsjap van'ne Commissie van Drie waerdje hae regeringscommissaris veur de omroop, opnuuj veurzitter van 't Lanjelik Sociaal-Charitatief Centrum en curator van'ne rooms-katholieke Universiteit van Nijmege. Ouch bekledje hae inkele commissariate in 't bedriefslaeve. In oktober 1956 waerdje hae lid van'ne Raod van Sjtaote. Nao de val van 't Veerde Kabinet-Drees waas hae van 22 december 1958 toet 19 mei 1959 minister-president, minister van Algemeine Zake, van 't Tweede (interim-)Kabinet-Beel.

Van 1959 tot 1972 waas hae vicepresident van'ne Raod van Sjtaote. Hae waas van 1948 toet 1973 biej väöl kabinetsformasies betrokke es formateur en informateur.

Louis Beel waerdje onger angere benumpdj teot Minister van Sjtaot en Grootkruuts in'ne Orde van'ne Nederlandse Leeuw en'ne Orde van Pius.

Louis Beel euverleej op 74-jaorige laeftied.

Trivia

De NS-locomotieve van'ne 2600 serie (geboewdj in'ne jaore '50) waerdje nao Louis Beel vernumpdj. De reeje waas, de geliekenis mit 't veurhoof van Beel.

Anger biezonjerhede

In de nuuj wiek 't Mösseveldj in de gemeinte Remunj is ein sjtraot nao Louis Beel genumpdj. Biej de feestelikke äöpening in 2000 van die wiek waare de naozaate van hem aanwezig.

Bronne

Dit artikel is gedeiltelik vertaaldj in 't Oeals vanoet de Nederlandse Wikipedia.

Ministerie van algemeine zake - Onger veurwaarde det de bron weurdj vermeldj, moge ongerdeile van'ne inhoud van dees website waere euvergenomme.

Externe link

• Biografie in het Biografisch Waordebook van Nederlandj