Heuvelland (Wes-Vlaondere)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan 't Heuvelland in Wes-Vlaandere.

't Heuvelland mèt deilgemeintes en aongrenzende (deil)gemeintes (zuug de hoofteks veur 'n verklaoring).

Ziech op 't dörp Loker vaanaof de Rodeberg.

Heuvelland (Wes-Vlaams: 't 'Euvelland) is 'n gemeinte in de Belzje provincie Wes-Vlaandere, in 't arrondissemint Ieper, tege de grens mèt Fraankriek en Wallonië (provincie Henegouwe) aon. De gemeinte besleit 'n oppervlak vaan 94,24 km² en had op 1 januari 2008 8.167 inwoeners.

Geografie

Deilgemeintes

't Heuvelland is 'n fusiegemeinte die neet nao ein vaan zien deilgemeintes is geneump. 't Gief ach deilgemeintes, boevaan Kemmel es hoofplaots gelt.

• I. Kemmel
• II. Wijtschate
• III. Wulvergem
• IV. Nieuwkerke
• V. Dranouter
• VI. Loker
• VII. Westouter
• VIII. De Klijte

Aongrenzende (deil)gemeintes

a. Poperinge (stad Poperinge) b. Reningelst (stad Poperinge) c. Dikkebus (stad Ieper) d. Vlamertinge (stad Ieper) e. Voormezele (stad Ieper) f. Hollebeke (stad Ieper) g. Houthem (stad Komen-Waasten) h. Neerwaasten (stad Komen-Waasten)

i. Waasten (stad Komen-Waasten) j. Mesen (stad Mesen) k. Ploegsteert (stad Komen-Waasten) l. Niepkerke (Nieppe, Fraankriek) m. Belle (Bailleul, Fraankriek) n. Sint-Janskappel (Saint-Jans-Cappel, Fraankriek) o. Boeschepe (Fraankriek)

Ligking en natuur

Wie de naom al zeet, is de gemeinte Heuvelland, in tegestèlling tot 't groetste deil vaan Wes-Vlaandere, op heuvelechteg terrein gesitueerd. De huugde vaan de heuvele is te vergelieke mèt die in Zuid-Limbörg, meh aanders es dao koume in de Wes-Vlaamse gemeinte heuvele bove de 200 meter neet veur. D'n hoegsten heuvel is de Kemmelberg mèt 156 meter; daonao volge de de Vidaigneberg (136 meter), de Rodeberg (129 meter; zuug foto) en de Scherpenberg (125 m). De mieste dörper ligke in 't dal, meh Wijtschate ligk bergop op de Helling vaan Wijtschate (82 meter). Sommege vaan de heuveltoppe zien bebos; väöl bos in lieger gelege gebiede is verlore gegaange, es lèste nog door oorlogsgeweld in d'n Ierste Wereldoorlog. Op de Rodeberg ligk 't zoegenaompde Hellegatbos, 'n brónbos ofwel e woud ('n vochteg bos mèt diechte begreujing). Door de huugdeversjèlle en de umgeving is de gemeinte geleef bij fietserenners en recreatief fietsers.

Historie

De gemeinte Heuvelland woort in 1977 gevörmp oet de gemeintes Kemmel, Wijtschate, Wulvergem, Nieuwkerke, Dranouter, Loker en Westouter en 't dörp De Klijte. Dit lèste dörp maakde daoveur deil oet vaan de gemeinte Reningelst, boevaan de hoofplaots toen bij Poperinge kaom.

Bekinde Heuvellanders

• Peter Plancius, cartograaf (gebore op Dranouter)
• Lucien Storme, fietserenner (gebore op Nieuwkerke)
• Annelien Coorevits, model (Miss Belsj 2007; gebore op Wijtschate)
• Geike Arnaert, zangeres vaan Hooverphonic (opgegreujd op Westouter)

Extern links

• Website vaan de gemeinte