Doetinchem

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Doetinchem in Gelderland

Doetinchem (Achterhooks: Deutekem of Durkem) is 'n stad en gemeinte in de Nederlandse provincie Gelderland, in d'n Achterhook, mèt 'n oppervlak vaan 79,67 km² (daovaan 0,53 km² water) en (per 1 januari 2007) 56.225 inwoeners. Neve Doetinchem ligke binne de gemeinte de dörper Gaanderen, Nieuw-Wehl, Wehl en Wijnbergen en de naobersjappe Het Broek, IJzevoorde en Langerak.

Stadsfuncties

Doetinchem is 't steidelek centrum vaan de gooddeils lendeleken Achterhook. Boete oonderwies veurzuut de stad oonder mie in 'ne weekmerret, cultuur en oetgoonsgelegehede. In Doetinchem is ouch industrie; door de ligking aon d'n Awwen IJssel is hei ouch industrieel transport euver 't water meugelek. In Doetinchem späölt wijer de betaold-vootbalclub De Graafschap.

Stadsgeziech

Kestiel Slangenburg

Door 't bombardemint in 1945 heet de binnestad e modern aonzien. Belangrieke monuminte zien de gotische Catherinakèrk en de Lutherse kèrk, en 't kestiel Slangenburg op 't gelieknaomeg landgood in de umgeving vaan de stad (laat-middeliews, verbouwd in de zeventiende iew).

Historie

Doetinchem weurt in 838 veur 't iers geneump, es Duetinghem. In 1236 kraog de intösse al ummoerde plaots stadsrechte vaan graof Otto II vaan Gelder. De plaots greujde oet tot 'n belangrieke stad in 't kerteer vaan Zutfen. In 1499 woort de stad door Jan II vaan Kleef belegerd. In 1527 voont 'ne groete stadsbrand plaots. De iewe daonao ontwikkelden 't ziech lankzaamaon. Tot 1920 waor Doetinchem gesplits in de gemeintes Ambt-Doetinchem en Stad-Doetinchem; in dat jaor woort die splitsing opgeheve. Aon 't ind vaan de Twiede Wereldoorlog, in aprèl 1945, leep de binnestad zwoer sjaoj op door e geallieerd bombardemint, wat per vergissing woort oetgeveurd (me wouw Kleef treffe). Nao d'n oorlog woort Doetinchem de belangriekste plaots in de regio, nao Zutfen en Doesburg, die iewelaank groeter waore gewees. In 2005 kaom de opgeheve gemeinte Wehl bij Doetinchem.

Externe link

• Website vaan de gemeinte

Commons: Doetinchem – Media gerelateerd aan dit óngerwerp