Vladimir Poetin

(Doorverweze van Vladimir Putin)

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Vladimir Vladimirovitsj Poetin (Владимир Владимирович Путин, Vladímir Vladímirovič Putin; 7 oktober 1952, Leningrad, Sovjet-Unie) is 'ne Rössische politicus en staotshouf en d'n allewijle president en opperbevelhöbber vaan de Russische Fidderatie. Heer waor veur twie termiene president vaan 7 mei 2000 bis 7 mei 2008 en daonao woort heer veur 'nen daarde kier verkoze tot president op 7 mei 2012. Heer is veur de veerde kier verkoze tot president vaan Rösland op 18 miert 2018.

Vaan 1999 tot 2000 en vaan 2008 tot 2012 waor heer de minister-president vaan Rösland (de zoegenaomde Veurzitter vaan de Regering, Председатель Правительства of Predsedatel' Pravitel'stva). Heer waor actief es directeur vaan de Fidderaole Veilegheidsdeens vaan de Russische Fidderatie (de FSB; d'n opvolger vaan de beröchte Sovjet KGB) vaan 1998 bis 1999 en sikkertaris vaan de Russische Veilegheidsraod in 1999.

Heer studeerde aof aon de Rechtefaculteit aon de Universiteit vaan Leningrad in de late zeveteger jaore. In 1977 begós heer te wèrke in de contraspioenaasj bij de KGB. Vaan 1985 bis 1990 wèrkde heer in 't hoofdictoraat vaan de KGB in Oos-Duitsland en in 't "Hoes veur Vrun vaan de Sovjet-Unie" in Dresden. Op 20 augustus 1991 verkraog heer d'n titel emeritus-kolonel vaan de KGB.

Vaan 1991 bis 1996 wèrkde heer es assistent-rector vaan de Universiteit vaan Leningrad in internationaol relaties, es veurzitter vaan extern relaties in 't Leningraads Stadshoes, adviseur vaan de börgemeister vaan Sint-Petersbörg en es vice-börgemeister vaan Sint-Petersbörg.

Zien ierste premiersjap, vaan 1999 bis 2000, naom Poetin euver vaan Sergej Stepašin en waor oonder d'n ierste president vaan de Rössische Fidderatie, Boris Jeltsin. Wie Jeltsin zien oontslaag aonkondegde es president, sjoof Jeltsin Poetin nao veure es presidentskandidaot. E paar maonde later woort Poetin d'n twiede president vaan de Russische Fidderatie. Wie Poetin president woort, naom Mihail Kas'ǎnov Poetins premiersjap euver. In 2008 woort Dmitri Medevedev d'n daarde president vaan de Russische Fidderatie, wijl Poetin weer 't premiersjap euvernaom, evels deze kier vaan Viktor Zubkov. In deen tied goof 't väöl vraoge euver dees machswisseling. De Russische groondwèt leet 't neet touw tot Poetin veur 'nen daarde kier kós weure verkoze tot president. Dit is 'n regel die väöl veurkump in rippeblieke (wie Fraankriek en de VS). Väöl critici zoge de machswisseling es 'n meneer veur Poetin um aon de mach te blieve, wijl internationale kritiek groetendeils te oontwieke door op force vaan de constitutioneel regels te speule. Dees kritiek woort allein meh dominanter wie Poetin obbenuits president bleek te wille weure in 2012. Dit gebäörde daan ouch: de Russische groondwèt zeet jummers tot me allein president kin zien veur twie termijne achterein. (In Fraankriek en de VS is dat aanders; dao maag me president zien veur meh twie termiene in 't gans leve). Medvedev en Poetin dege 'n lètterleke machswisseling; noe woort Medvedev premier en Poetin woort obbenuits president.

Poetin waor tiejes zie premiersjap lid vaan de partij Vereineg Rusland, die ouch de groetse partij vaan 't land is gebleve en de mierderheid in de regiering heet behawwe sinds deen tied. Sinds heer weer prizzendent is vaan de Fidderatie is heer gei lid mie vaan de partij; dat laot de Rössische wèt neet touw. In de praktiek heet Poetin evels ing ben mèt de partij, häör kabbinèt en de veurzitter vaan 't kabbinèt en de partij, de premier, Dmitri Medvedev.


Zuug ouch bewirk

Brón bewirk

  • Rössischtaolege Wikipedia
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Vladimir_Poetin&oldid=458901"