Dmitriy Medvedev
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
.jpg)
Dmitriy Anatol'evič Medvedev[1] (Rössisch: Дмитрий Анатольевич Медведев, sprik oet: Dmietriej Anatoljeevietsj Mjedvjedjev; 14 april 1965, Leningrad in de Sovjet-Unie) is 'ne Rössische polletieker dee de veurzitter vaan de Veilegheidsraod vaan Rösland is sinds 2020. Medvedev is prizzedent vaan de Rössische Fidderatie gewees (2008-2012) en premier vaan 't land gewees (2012-2020) (zuuch ouch: Lies vaan Rössische leiers).
In 2008 woort Medvedev verkoze es d'n daarde prizzedent vaan Rösland. Heer woort gezeen es de liberalere variant vaan ziene veurgenger, Vladimir Poetin. Poetin zelf woort premier vaan Rösland oonder Medvedev zien prizzedentsjap. De groetste prioriteit vaan Medvedev in zie prizzedentsjap waor 't moderniseringsprogram, mèt es buut um de ikkenemie en maotsjappij vaan Rösland te modernisere nao Westers model en 't land minder aofhenkelek te make vaan olie en gaas. Oonder Medvedev zien prizzedentsjap woort 'nen akkoord geteikend mèt de Vereinegde Staote um nuclaire waopes te reducere ('t New START-verdraag). Daoneve maakde Medvedev ziech populair door 't winne vaan de Rösso-Georgischen Oorlog en door Rösland groetdeils oet de Groete Recessie te trèkke. Medvedev maakde ziech ouch bekind mèt 'n campagne contra corruptie. Later zouw Medvedev evels zelf weure besjöldeg vaan corruptie.
Heer waor prizzedent veur veer jaor, boenao Poetin 't prizzedentsjap in 2012 weer euvernaom. Medvedev woort toen weer door Poetin veurgedrage es premier. Op 15 jannewarie 2020 naom Medvedev, same mèt de res vaan de regering, oontslaag, zoetot Poetin zien groete constitutioneel veraanderinge kos realisere; Mikhail Mishustin naom 't premiersjap vaan Medvedev op 16 jannewarie 2020 euver. Op dee zelfden daag beneumde Poetin Medvedev tot de veurzitter vaan de Veilegheidsraod vaan Rösland.
Sprunk
bewirk- Ingelstaoleg en corresponderend Wikipedia-artikel