Sjömmert

Dit artikel is gesjreve (of begós) in 't Sjömmerts. Laes hie wie v'r mit de versjillende saorte Limburgs ómgaon.

---

De kèrk van Sjömmert geboewd in kundersjtein.

Sjömmert (Nederlands: Schimmert) is e dörp in de gemeinte Baekdale. Sjömmert is, nao Ubachsberg, 't hoags gelaege kèrkdörp van Nederland. Woas se ouch nao toe geis, doe mós ummer bergaaf, ofs se noe nao 't aangrenzende Hölsberg, Valkeberg, Nut, Meersje, Sjpauwbik, Ulesjtraote of Genhout geis. Óp 1 januari 2017 wone d'r 3.226 luuj.

In 't jaor 50 nao Christus zou hie 'n nederzètting höbbe gesjtange van de Sunici of Schineks. De ièrsjte vermelding zou zin oet 847 es Schimortera. Hie is in 2010 ouch de Brei Sjoal nao verneump.

Bie Sjömmert huère de buurtsjappe:

• Oansel (Oensel)
• Gekruus (Kruis)
• Groat Hazel (Groot Haasdal)
• Klein Hazel (Klein Haasdal)
• Op de Bies
• Roosebeek is 'n buurt die in 't midde van Sjömmert lik. Ze besteit oet twiè sjtraote: de Rooseveltsjtraot en de Bekerbaan. De buurt haet 'n buurtvereiniging.
  
• De Put is 'n buurt besjtaonde oet de Mareweg, de Langsjtraot, de Vauwerhofwaeg en Rozemarijnsjtraot.

Bezeenswaerdig

De watertaore van Sjömmert

• Sjömmert is bekènd van ziene watertaore oet 1926, dae al van gans wied is te zeen. Architect Jos Wielders maakde 't óntwerp, dat vèlt ónger de sjtiel van de Amsterdamse sjoal. De huègde is 38 maeter en de taore sjteit op 178 m baove N.A.P. 't Betonne reservoir haet 'ne doorsjnee van 13,5 m., 'n deepde van 7.90m en 'ne inhoud van 1150 m3 of 1.150.000 lieter. De watertaore is sinds 'n aantal jaor boete gebroek van de WML. 'ne Plaatselike óngernummer haet zich euver 't rieksmonument óntfermp.
• In de Hoofsjtraot sjteit de neogotische kèrk gewiejd aan de heilige Remigius. Ze is geboewd in kundersjtein op de fundamente van 'n ouw kèrk oet 1832. De taore is 65 maeter hoag. De architecte van 't geboew zin Joseph Cuypers en Pierre Cuypers jr.. Binne sjtaon 'n Barbarabeeld van Charles Eyck, 'n houte beeld van Theresia van Lisieux van Jean Weerts en gebrandsjilderde vinstere van Jos Stassen. De pastorie sjtamp van 1898. Hie lik ouch 'n aantal ouw häöf woa-ónder eine dae in vakwerk is opgetrokke.
• In de gehuchte van Sjömmert zint 'n groat aantal kepèlkes te vènge, woavan 't groatste gedeilte is gewiejd aan Maria. De Maria-verièring haet altied 'n prominente plaats gehad in de parochie van Sjömmert en is saer de kóms van de Patersj Monfortanen en de Dochters der Wijsheid flink gegreujd. In totaal sjtaon d'r vief kepèlkes, te weite :
  • De Mariakapel op De Bies
  • De Mariakapel in Gekruus
  • De Mariakapel in Klein Hazel (baove )
  • 't Sint Rochuskepèlke in Klein Hazel (ónger)
  • De Sint Hubertuskapel in Groat Hazel

Daonaeve zint ouch nog 'n groat aantal waeg-kruzer te vinge en sjteit 'n Heilig Hartbeeld in Klein Hazel, op de sjplitsing Hermessjteeg/'t Krakes

• Ónger in de Bies is sinds 'n aantal jaore 'n gedachtenis-monument opgerich ter herdènking aan de gesjloopde kloastersj van de Paters Monfortane en de Dochters der Wijsheid.

Persone

In Sjömmert is Gulielmus Lemmens gebaore, dae van 1932 bis 1958 bisjop van 't bisdom Remung waor.

In Sjömmert weunt GroenLinks-politica Désirée Schmalschläger (1965), zie is börgemeisterse vaan Leudaal.

Legende

Euver Sjömmert geit ouch ein legende. Wie Karel de Groate ins verdwaald waor, zoog hae op 'n gegaeve moment örges 'n leech sjiene (Sjènne), en 'n leech sjömmere (Sjömmert). Omdat hae zao dankbaar waor dat 'r de waeg weer truk houw gevónge, leet 'r oet dank op de plaats woa hae 't leech zaog sjiene en sjömmere ein kapel boewe

Dörpsvereiniginge

• Fanfare St. Caecilia Schimmert 1845 (www.fanfareschimmert.nl)
• Sjuttersgezelsjap Sint Sebastiaan (heropgerich 1957, mer volges alles hei Sjömmert al 'n sjötterie in de 17e ièw)
• Voetbalvereiniging Schimmert 1940
• Carnavalsvereiniging de Taarbreuk 1957
• Toneelvereiniging Crescendo
• Jong Nederland
• TaofelTennisVereiniging Quick 72
• Tennisclub De Waterkoel