Hunnekem

Dit artikel is gesjreve (of begós) in 't Nuts. Laes hie wie v'r mit de versjillende saorte Limburgs ómgaon.

---

Sjpekhoeës i Hunnekem

Windmuuële va Hunnekem

Hunnekem (Nederlands Hunnecum) is e gehuch, gelaege op 't plateau, behurend bie de gemeinte Baekdale in Zuud-Limburg mèt ongevier 80 inwoeënesj. ’t Besjteit oet ‘n 30 boerderieje en hoezer. D'r naam Hunnecom kumt van woning-verblijf (heëm) van de persoon Hun. 't Suffix 'um' betekent heem of heëm De oudste vorm zou Hunningahem zin gewaes.

Monumente

Dao ligke e paar monumentaal gesjlaote boerderieje, zoeë-es:

• Hunnecum 6 oet 1797 mèt wit gesjilderde mergelsjteine tópgaevel.
• Hunnecum 4 en 7 datere oet d'r 19e ieëw.
• De wit gesjilderde gesjlaote haof Hunnecum 17 haet 'ne 18e ieëwse kern.
• Karakteristiek is d'r boewsjtieël va vuural ‘t sjpekhoes. De moere zunt va baksjtein gelardierd mèt horizontaal mergele beng, die witgeverf zunt. Baoëve de paoërt va deës carréboerderie bevingk zich 'ne sjleetsjtein woeë-op 't jaoërtal 1824 vermeld sjteet.
• Aan d'r rand van de beboewing sjting vreuger ’ne weuste sjmeedieëzere waeëgwiezer oeët 1904, op de vruuëger krutsing va d'r waeëg Hölsberg, Aolbaek richting Nut en d'r waeëg Griëzegröbbe, Tersjtraote richting Vink, Wienesrao, Brómmele.

In 1938 woert d'r riekswaeg verbreid, doe kaom e gedeilte van 't gehuch aan 'ne ventwaeg te ligke. D'r haof van de families Somers-Erven en later Somers-Pinckaerts (Hunnekem 15) woert vanwaege die aanpassing aafgebraoke.

• Electriciteitshuuske, geplaatsjt in 1920, in zakelijk-expressionistische sjtiel.
• Tösje Hunnekem en de Vink lik i ge veld 'n plek mèt d'r naam "d'r Blauwe sjtein". Bie ‘ne blauwe muuëlesjtein verzamelde zich de ouw Germane of dege dao rech sjpraeke. Op 'n kaart oet 1840 sjteit d'r naam voloet genumd. Allewiel is d’r ’n manege gevestig.
• Aan d'r uuëverkant van de hudige krutsing, aan d'r Putwaeëg, sjteet 'n sjmeedieëzere waeëgkruts. Vlakbie löp, parallel aan d'r Putwaeëg, de Pötgats.

Op 'n huuëgde aan d'r doergaonswaeëg bevingt zich de windmuuële va Hunnekem, geboewd in 1882. 't Is ein va de wieënige windmuuëles va Zuud-Limburg naeëve die op De berg (Ubachsberg), op Kelment (Kelmond), in Groesjelt (Gronsveld), in De Uëverhieëk (Overheek), op 't Gastes(Wolfshuis-Gasthuis) en i Oeësjbik (Oirsbeek).