Sanderbout

Dit artikel is gesjreve in 't Mofers. Ómdat 't plaatsgebónge is, maogs doe 't ómzètte nao 't Zittesj, es te dit dialek sjpriks.

---

Sanderbout is 'n wiek in Zitterd.

De ligking van Sanderbout inne gemèndje Zitterd-Gelaen.

Mienwirkerswoning in de Ericastraat.

De wiek is gelaengen ane zuudwèstelike randj vanne stad en wuuertj ane naordelike en wèstelike kantj ómslaote dore spaorwaeg Remunj-Mestreech, ane oeastelike kantj dore spaorwaeg Zitterd-Haerle en ane zujelike kantj dore Middewaeg (N276). Dees wiek is e typisch veurbeild van 'n veurmaolige "mienwirkerskóllenie", 'n arbeidersbuurt die ane begin vanne twintjigsten ieëf woort geboedj veur mienwirkers te hoesvèste. Oearsprunkelik loge dees saort aan naerzèttingen op einigen aafstandj vanne bestäöndje woeankerne, mer huuj is Sanderbout aaneingegreudj mitte res van Zitterd. De wiek kan wiejer óngerverdeildj waeren inne buurte Achbunjer, Kleindörp en Sanderbout. De buurte Kleindörp en Sanderbout woorten óntwórpe dore arsjitek Jan Stuyt enne boew vanne ieëste weuninge begós in 1918.

De wiek is verneump nao Zwentibold (Sanderbout), de keuning van Lotharinge van 895 toet 900. Behalve dees wiek zeen ouch väöl anger dinger inne ómgaeving van Zitterd, wie straoten en vereine, verneump nao deze keuning.

Dees wiek is ónger angere veurzeen van 'n supermert, frituur, kaffee, kickboksdojo, voetbalklöb, slechter, sjoeal, maotsjappelik wirk en e meziekkorps. Versjillige vereine zeen actief inne wiek, worónger VV Sanderbout, DC D'n Hook, CV. De Koelköp, De verseerders en Fanfare St. Barbara.