Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Gelaen-Zuid is de meis zuidelikke wiek van de veurmalige gemeinte Gelaen, allewiel deil makend van de gemeinte Zitterd-Gelaen.

De wiek wirt ómsjlaote door de autowaeg A-76, Riekswaeg Zuid, de Daalsjtraot en de Sjpawbaeklaan en grens aan de Gelaense wieke Kraonkel en De Kloes. In de wiek bevènje zich een aantal hoagboewflats (o.a. de Pijperflat en de Wagenaarflat) en ein aantal veurzeninge die van belang zint veur Gelaen en ómsjtreke. Zoa ligk dao de groate middelbaar sjoal, 't Graaf Huyn College, 't winkelcentrum de Zuidhof en ein aantal zörgcentra, zoa-es Orbis Sint-Jansgelaen, Orbis Sint Odilia, Vivantis Zörggroep en ’t Woonzörgcentrum De Bunderhof. Ouch zint d'r is ein aantal sjportvereniginge gevestig, zoa-es de voetbalclub FC Gelaen Zuid en taofeltennisvereniging TTV Kloes. Aanvankelik laog in de wiek ouch ’t Barbara Ziekehoes dat in de jaore 1980 aevel is gesjloop wiej ’t opging in 't Maaslandjziekehoes in Zitterd.

Óntsjtaon bewirk

De wiek is groatedeils in de jaore 1960 en 1970 geboewd óm de ónsjtuimige greuj van Gelaen toentertied op te vange. Ze is in feite in tweë fase geboewd. ’t Eësjte deil, geboewd ten noorde van de Jos Kleijnenlaan mèt allein mèr leëgboew, waas aanvankelik ein oetbreijing van Kraonkel en de Kloes. Biej de boew van ’t tweëde deil ten zuje van de Jos Kleijnenlaan woort ’t besjtaonde gehuchske Sjpaans Neerbaek gans opgesjlók door de nuujboew en verdween van de landjkaart. Allein ein sjtraot mèt de naam Sjpaans Neerbaek en ènnige van de aw hoeze van ’t gehuch herinnere nog aan dit awt plaetske. De Keutelbaek, ein ziejbaek van de Gelaenbaek, die ’t gehuch doorsjtraomde is mèt de boew van de wiek ouch verdwene. Biej dees tweëde fase ware de contoure van de flats es eësjte zichbaar, later is d'r nog ein heël sjtök biejgeboewd tot aan de dörpe Sjpawbaek en Neerbaek.

Doordat de wiek nog relatief jónk is, kènt Gelaen-Zuid ouch gein traditioneel roams-katholieke kirk zoa-es in Awt-Gelaen, Lötterao en De Lèndjheuvel.

Bereikbaarheid bewirk

De wiek is good bereikbaar door zien ligking pal aan de autowaeg A76, de sjpaorlien Haerle-Zitterd en de situering aan groate waeg bènne de gemeinte Zitterd-Geleen. De belangriekste waeg bènne de wiek zint de Jos Klijnenlaan, Lienaertsjtraot, de Sjpawbaeklaan en de Rembrandtlaan. Ouch is de wiek good bereikbaar per aopebaar verveur door middel van ein aantal böshaltes.

Bevolking bewirk

De wiek Gelaen-Zuid kènt door de aanwezigheid van ein bejaordehoes en ein bejaordeverzörgingscentrum ein vriej hoage laeftiedsopboew. Ouch wone d'r in dees wiek relatief väöl luuj van allochtone aafkóms en väöl luuj van de middesjtand. Daodoor kènt de wiek ein nogal gemengde bevolking.

Gemeinte Zittert-Gelaen
Sjtae en dörper: Bor · Beech · Buchte · Einikhoeze · Gelaen · Göttekaove · Houtem · Lömmerig · Munstergelaen · Opbeech · Papenhaove · Zittert
Buurtsjappe en gehuchte: Abshaove · Awt-Gelaen · Baandert · Broukzittert · Danike · Dassekoel · Europapark · Euverhaove · Gelaen-Zuid · Graasbrook · De Graathei · Haagzittert-park · Harrekaove · De Haze · Hazelderveldj · Hogenberg · Hóndjsbrook · Hoogveldj · Janskamperveldj · Kempehaof · De Kloes · Kolleberg · Kraonkel · Klein-Holtem · Laarhof · De Landjgraaf · Leiebrouk · De Lèndjheuvel · 't Lömmerigerveld · Lötterao · Mesjtreechterbaan · Ophaove · Rosengarten · Sanderbout · Sjpaans Neerbaek · Sjpaorkóllenie · Sjtadbrouk · Sjipperskèrk · Staaj · Vrangedaal · De Wèndjraak · Wolfrath
Kollenieë: Achbunjer · Teenbunjer
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Gelaen-Zuid&oldid=427754"