Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Pierre Cnoops op 'ne Veolia-trein.

Pierre Cnoops (Maasbrach, 4 juli 1938 - 1 december 2018) waas eine Nederlands Limburgse buuttereedner.

Biografie bewirk

Zien talent es buuttereedner is häöm mèt de paplaepel ingegaeve. Zien vader Math waas namelik eine heël verdeenstelike 'veurdrachskönstenaer' dae mèt zangk en komische presentatie, zien mimiek, zien sjtöm en zien timing 't pebliek in väöl zale wis te boeje, ein optraeje dat es de veurluiper van de buut koosj waere gezeen.
Op de leëgere sjoal moosj Pierre al veur de klas sjtaon óm möpkes te vertèlle en op jeugdige laeftied woort hae betrokke biej de plaatsjelike fanfaar 'Eensgezindheid' en begoosj zien carrière es humoris wie hae optrooj biej 't jaorlikse St. Ceciliafeës. Hae woort lid van de toneëlvereiniging in zien woonplaatsj en woort posbode biej de PTT, zoaes hae 't zelf oetdrökde - "ee pöske bie de pos" -, ein "pöske" dat hae allewiel nog ummer bekleid. Mèt dank aan de PTT veur de meneer wo-op zie ónger al die jaore häör bereidwilligheid toande went Pierre zien buuttereednerslaeve in 't gedrang kaom mèt de oetoefening van zien taak es posbode.
Biej de toneëlvereiniging kaom hae in aanmèrking veur 't sjpele van de hoofrolle, get wat häöm mèt eine dusdanige flair en vakmansjap aafgóng, dat hae van versjillende kantje woort aangesjpaord èns mit te doon aan de zoageneumde "buuttewedsjtrieje".

Van ’t ein kaom 't anger, organisaties bookde Pierre veur broelofte en vereinigingsfeëste, eësj nog regionaal mèr al gaw door de heële provincie. Hae kaom in beeld biej de Culturele Raad Limburg (ein óngeraafdeiling van "Veldeke" dat zich sjpeciaal bezig hilt mèt ’t behawt van de Limburgse volkscultuur, ónger meë 't Limburgs dialek), die in daen tied de Limburgse Buuttereedner-kampioensjappe organiseerde en in 1961 kroog hae 't verzeuk óm veur 't eësj mit te doon aan de Provinciaal Buuttekampioensjappe in Mesjtreech.
Naodat hae in 1962 veur de tweëde keër hèj mitgedaon aan 't Limburgse Buuttekampioensjap in Baek, woort hae biej zien derde deilname in 1963 in Eijsde de glorieuze winnaer mèt zien legendarische buut 'De Jaeger'. Ziene naam waas noe definitief gevèstig en de laovende recensies in de gezètte, de interviews en de optraejes veur de radio zörgde veur nog meë naamsbekèndheid. Zelfs 't NTS-journaal berichde euver ziene behaolde kampioenstitel en hae maakde ein legendarisch, 15 minute doerend, optraeje op Awwejaorsaovend in de 't Tv-program 'Voor de vuist weg' van Willem Duys. Hae woort ouch gevraog óm op te traeje in de Tv-shows van groatheje es Mies Bouwman, Pim Jacobs, Andre van Duin en de Mounties.

In 1964 trooj Pierre in zien eige Maasbrach op es gasbuuttereedner in 't door de Carnavalsvereiniging 'De Hoonder' georganiseerde buuttekampioensjap, mèr in 1965 waas hae weer van de partie in Zitterd en woort hae opnuuj Limburgs kampioen mèt de buut es 'Architek'. 't Succes kènde gein grenze en hae kroog väöl verzeuke óm ouch boete 't carnavalsezoen optraejes te doon.

In 1966 naom hae deil aan eine wedsjtried wo veer veurmalige Limburgs buuttekampioene 't taenge mekaar opnome. Hae wis dees concurrente achter zich te laote en wón de wedsjtried mèt de buut 'Directeur van de Verzekeringsmij. De Mondelinge Knoops Algemene 1911'. Zien euverwinning leverde häöm de 'Gouwe Narrekap' op.
In 1971 woort Pierre veur de derde keër Limburgs buuttekampioen, deze keër in Remunj mèt de buut 'De Douanier'. Dit waas mètein zien lètste deilname aan 't buuttekampioensjap ónger zien motto: Nao drie keër kampioen te zeen gewaes gaef te de angere ouch ein kans.

Hae reisde 't heële landj door óm ziene humor oet te drage en trooj tieën jaor langk op in 't populaire radioprogram 'Kom eens langs in………….' van Karel Prior. In 1982 waas hae zelf de hoafpersoon in dit program. Hae trooj ouch op veur 'Hollandse Clubs' in Singapore, Brazilië, Curaçao en in Zuid Afrika bezoch hae zoawaal Kaapsjtad es Pretoria. Mèt 't orkes Freddy Golden van Jan Kok trooj hae op in Zjwitserlandj, Oasteriek en op de Canarische Eilande.

Wie hae biej de PTT-pos mèt de VUT koosj gaon, bleef hae zien werk, dat óngertösje zien laeveswerk waas gewore, es hobby oetoefene. Allewiel sjteit hae, veural in de carnavalstied, nog meëdere keëre in de waek op de plenk óm ziene humor te presentere. In 2004 bereikde hae 'ne mielpaol in zien optraejes wie hae zien 4 x 11 jaor jubileum es arties vierde en wobiej häöm ouch nog èns eëretitele 'Limburger van Verdeenste' en 'Eërebörgersjap van Maasbrach' woorte verleënd.

Pierre Cnoops is lid van 't Groat Limburgs Buuttecomitee, de hujige organisator van de Limburgse Buuttekampioensjappe die ónger auspiciën van het L.V.K.A. (Limburgse Vereiniging van Carnavalsartieste) waere gehawwe, wovan hae ouch nog ein gewaardeerd besjtuurslid is. Ouch is hae betrokke biej de organisatie van 't Tonpraotersgala in Hulst in Zeeland.

Óngersjeijinge bewirk

  • 1967: Boetegewoon Eërelid van de sjtudentevereiniging van de Economische Hogeschool in Rotterdam.
  • 1967: Beneuming tot Doctorandus Humoris Sausa aan de NUL (Narren Universiteit Limburg).
  • 1969: Orde van het Gulden Wammes in Maaseik
  • 1970: Professor aan de NUL
  • 1971: Vice Manjefieke Rector van de NUL
  • 1972: Manjefieke Rector van de NUL
  • Medaaje van 't Roaj Kruus
  • Martien Stollmanpries (van de legendarische Globetrotters) van Heërle
  • Gouwe lègkpenning van de gemeinte Genk
  • Eërelègkpenning van de sjtad Remunj en de sjtad Zitterd
  • Zilvere Buut, medaaje van verdeenste van de B.C.L.
  • Limburger van Verdeenste
  • Eërebörgersjap van Maasbracht
  • De óntvange carnavalsóngersjeijinge zint neet meë te tèlle. Waarsjienlik haet hae van alle plaatsje en alle vereiniginge in Nederlandj d'r waal ein óntvange.
  • 2004: Orde van de Gulden Humor
  • 1997: Ridder in de Orde van Oranje Nassau[1]

Trivia bewirk

Externe link/brónne bewirk

  1. de Volkskrant, 30 april 1997
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Pierre_Cnoops&oldid=434324"