Middellandse Zie

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

De Middellandse Zie (Spaons: Mar Mediterráneo, Frans: Mer Méditerranée, Italiaans: Mar Mediterraneo, Grieks: Μεσόγειος Θάλασσα of Mesógeios Thálassa, Turks: Akdeniz en Arabisch: Al-Bahara' Medala'osit) is 'n zie die gelege is tösse Noord-Afrika, Wes-Azië en Europa in. De Middellandse Zie weurt ummertouw gezeen es de grens tösse Europa en Afrika, zoewel veur de lui die e klein beeld vaan Europa höbbe, es de lui die geluive in 'n groeter geografisch Europa.

Ligking

Väöl len grenze aon de Middellandse Zie. Dit is veur de zuidkös vaan Spanje, Fraankriek, Italië, Kroatië, Albanië, Griekeland en Törkije 't geval. Daoneve ligk de Middellandse Zie ouch aon de noordkös vaan Marokko, Algerije, Tunesië, Libië en Egypte. Ouch de weskös vaan Syrië, Libanon, de Gazastrook en Israël ligke aon de Middellandse Zie. De Europese len Malta en Cyprus weure es eilen gaans umrink door de Mediterraonse Zie.

Zieë in de Middellandse Zie

De volgende zieë bevinde ziech in de Middellandse Zie:

De Adriatische Zie - tösse de ooskös vaan Italië en de weskös vaan Griekeland
De Egeïsche Zie - tösse de ooskös vaan Griekeland en de weskös vaan Törkije
De Ionische Zie - tösse de "punt vaan d'n Italiaanse stievel" en de Griekse eilen in
De Ligurische Zie - tösse Corsica, Italiaanse rivièra en Zuid-Fraankriek in
De Tyrreense Zie - tösse Sardinië, Secilië en ut Italiaanse vasteland in
De Levantiense Zie - tösse Cyprus en Törkije in
De Zie vaan Alborán - tösse Spanje en Marroka in
De Balearische Zie - tösse Spanje en Algerije in
De Libische Zie - tösse Kreta en Libië in

Eilen

westelek: de Baleare mèt Mallorca, Menorca en Ibiza
centraol: Corsica, Sardinië, Sicilië, Malta en Djerba
oostelek: Kreta, Rodos en Cyprus