Zieë van Alborán
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
De Zieë van Alborán is 't meis westelike stök van de Middellandse Zieë. Zie leejt tösse Spanje en Marokko. De zieë wuurt begrens door Cabo de Gata in Andalusië en Cap Fegalo in Algerieje in 't oeëste en Gibraltar en de Spaanse exclave Ceuta in 't weste. Vanaaf dao verbind de Straot van Gibraltar de zieë mit d'n Atlantische Oceaan. 't Zaltgehalte is heej get lieëger es in de res van de Middellandse Zieë, doordet 't zaltere en dös zwaordere zieëwater van de Middellandse Zieë ónder 't get zeutere oceaanwater struimt.
De gemiddelde deepde is 445 maeter en 't deepste stök is 1.500 maeter. Midde in zieë leejt ouk 't eilandsje Isla de Alborán. Aan de Marokkaanse kös ligge verschillende kleine eilendsjes die tot Spanje behure, mer geografisch in Afrika ligge en door Marokko wure geclaimd. Dees eilendsjes en exclaves wure de Plazas de soberanía geneump.