De Lèndjheuvel

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.

---

De Lèndjheuvel (sjpelling gemeinte Zittert-Gelaen: De Lèntjheuvel; Nederlands: Lindenheuvel) is 'n buurtsjap in Gelaen in de gemeinte Zittert-Gelaen in Nederlands Limburg.

De wiek is mèt ongeviër 7000 inwoners teves de groatste wiek van Gelaen en kènmerkt zich door ein sjterke identiteit. Zoa haet de wiek eine eige mèrt, eine eige jaorlikse kèrmes, 'n eige voetbalclub (RKFC Lindenheuvel) en 'n aantal veurzieninge róndjóm de kèrk, de O.L. Vrouw van Altijddurende Bijstand. De Lèndjheuvel is ouch gelaege aan de sjpaorlien Zitterd-Mesjtreech en haet 'n eige sjtasie Gelaen-Lötterao, gelaege op de grens mèt de wiek Lötterao.

Óntsjtaon van de wiek

De Lèndjheuvel is hauverwaege de veurige ièw geboewd in 'ne korte tied om de väöle mienwèrkersj van Sjtaatsmien Maurits in Lötterao óngerdaak te beje. Zoadónde kaome d'r in de jaore 50 en 60 väöl gasarbeidersj oet mediterraan lènj te wone, zoaes Marokkane, Turke en Grieke. Ouch kaome d'r väöl luuj van Molukse aafkóms te wone. Dit is tot op de daag van vandaag trök te zeen in de bevolking.

De wiek tegewoordig

De lètste 10 à 20 jaor is d'r väöl biegeboewd in de wiek. Zoa is d'r de buurt "Landjgraaf" biegekómme, wodoor 't karakter van de wiek einigzins is verangerd. De wiek is opgesjplits in ermer en rieker deile. De multicultureel bevolking maak de wiek divers en de óngerlinge bandj tösje de bewoners is groat.