Helshove

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Loeëners, es te dit dialek sjpriks.

Helshove (Nederlands: Helshoven) ies 'n gehuch in de deilgemeinte Hoepertènge (Loeën) in Belsj Limburg.

Romeinse waeg en kapel

Aan de Romeinse waeg van Boulogne sur Mer nao Kölle, de Via Belgica geneump, die hie euver 'n trajek van inkele kilomaetersj ónder 'n fietspaad löp, sjteit 'n kapel, gewiejd aan Slevevrouw van de Bliej Vrae, die truukgeit nao 'n baekapel oet 1254 geboewd door de Joannietersj. (Later de riddersj van de Maltezer Orde geneump). In de Tachtigjaorige oorlog brende de kapel aaf. In 1661 haet de groatcommandeur van Alden Biesen de kapel wir laote opboewe. Daovan getuug zien waope bove d'n ingank van 't gebuuwke. In 1674 moch hièremiet Gerardus van Deventer oet Terheijden neve de kapel 'n kloes inriechte. In de jaore daonao volgde 14 manne. Zie höbbe de kapel 234 jaor lang ónderhoute, kranke verzörg en ónderwies gegeve. De lètste kloezenaer, Andreas Gielen, sjtorf in 1908, naodat 'r 56 jaor in Helshoven houw verbleve. In de tuin van de kapel sjteit zien sjtandbeeld. In 1925 woort de kloes aafgebroke.
't Mariabeeld in de kapel woort bie 'n bezeuk van paus Johannes Paulus ll in 1985 in Ieper gewiejd. Binne sjteit 'ne praeksjtool in gotische sjtiel oet 1550 en 'ne biechsjtool oet 1570.

In Helshoven liek gein kèrk, waal bevinge ziech hie nog 'n paar carréboerderieje, hoagsjtambóngerde, fruitbedrieve, hol waeg en 'n galg. In de buurt sjtruimp de Herck.