Gebroeker:Steinbach/E gebouw in eder land
In 2019 sjreef iech dit essay, boe-in iech 't aontal meugeleke pagina's sjatde. Iech zag dao-in oonder mie tot 't gemiddeld in eder plaots op de wereld wel e gebouw zouw geve wat 't besjrieve weerd waor. In e later essay oet 2022 kaom iech dao-op trök: zoeget wat me in Europa kint, mèt in eder gaat e kèrkske en aanders wel 'n aw boerderij boe me euver wèlt leze, dat besteit neet euveral op de wereld - en es 't besteit, boe haolt me daan bronne vaandan?
Um te kieke wie 't is um euver gebouwe te sjrieve, en ouch gewoen um get leve te trampe in 't werk op Wikipedia, wèl iech de koumenden tied (godwèt wie laank) e gebouw in eder land besjrieve. Veur väöl len zal dat gein inkel probleem zien: de höbs de keus oet doezende, op groeter Wikipedia's oetgebreid besjreve gebouwe. Bij atolle in de Zuidzee en ex-piraote-eilendsjes in 't Caribisch gebeed weurt dat lesteger - meh 't kin wel.
Jehmeh, jehmeh, jehmeh... wat moot de Limbörgse Wikipedia daan mèt 'n artikel euver ein of aander k*tgebuiwke aon d'n aandere kant vaan de wereld? Kortbij hoes is zoeväöl nog neet besjreve. Klop. Meh doel heivaan is, boete de lol (sjpas?) dee iech zelf devaan höb, veur 't oetteste wie dat oetzuut, sjrieve euver eder klei dingske op eerd. Of dat haolbaar is, en wie dat vèlt in de contex vaan eus projek. Euver contex gesproke: d'n iersten tied zalle väöl gebouwe nog wel weiskinnekes blieve, praktisch oonvindbaar veur de gewoene lezer. Dat moot daan mer, meh iech zal mie bès doen veur ze zoe väöl meugelek in te bèdde.
Eve e paar klein regele veur miechzelf:
- Iech sjrijf allein euver gebouwe boe nog gein artikel vaan besteit
- In len boe iech al gewees bin, geit gezeen veur oongezeen (al kin iech daovaan aofwieke es dat ech moot)
- Alle zelfstandege len koume aon de beurt, meh neet-zelfstendege gebeje num iech nao eige bevinde op (dus soms wel, soms neet)
O jao, en daan dit nog: geer gaot väöl kèrke en regeringsgebouwe zien. Dat heet niks mèt mien euvertuiging te make, meh alles mèt wee de sjoenste en opmerkelekste gebouwe neerzèt.
Lies
bewirkTe beginne mèt Europa; ander continente vrotte v'r strak gewoen alfabetisch detösse.
