Conway Twitty

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Conway Twitty (gebaoren es Harold Lloyd Jenkins; 1 september, 1933 - 5 juni, 1993) waas 'nen Amerikaanse country zenger. Hae haw ouch väöl succes in anger genre's, wie rock-'n-roll, rock, R&B en pop. Van 1971 toet 1976 óntvóng Twitty väöl prieze vanne Country Music Association veur zien duette mitte zengerin Loretta Lynn. Tródsdet t'r noeatj e lid vanne Grand Ole Opry is gewaes, woort t'r opgenómmen in zowaal de Country Music es de Rockabilly Hall of Fame.

Twitty zie nómmer It's only make believe oet 1958 bereikdje 't meiste publiek. In 1965 sjaltdje d'r euver van rock-'n-roll nao countrymeziek. In det genre woort t'r eine vanne populairste zengers: inne countryhitlies van Billboard scoordje d'r tösse 1968 en 1986 fieërtig nómmer 1-hits, worónger vief duette mit Loretta Lynn. Jaorelang haw d'r 't record vanne meiste countrynómmer 1-hits, toetdet George Strait det in 2006 verbrook.

Jóngere kènne Conway Twitty döks dore hommages aan 'm die te zeen zeen inne animatieserie Family Guy. Inne aaflevering The Juice Is Loose kan me zoea 'n ganse liveregistraasje van 't nómmer I See The Want To In Your Eyes vanne begin toetanen ènj zeen.

Laeven en karrejaer

Jeugjaore

Conway Twitty woort gebaoren es Lloyd Jenkins op 1 september 1993 in Friars Point, Coahoma County in naordwèstelik Mississippi. De Jenkins-femielje waas van Welshe kómaaf. Hae waas verneump door zienen achterome nao dem ziene favoriete stómfilmaktäör, Harold Lloyd. De femielje verhoesdje nao Helena, Arkansas wen d'r tieën jao waas. Dao vörmdje d'r zien ieëste zanggroep.

Twieë jaor later haw Jenkins zienen eige show oppe lokale radio oppe zaoterdigmörge. Hae speeldje ouch honkbal. Hae kreeg 'n aanbód óm mitte Philadelphia Phillies te spele naodet t'r aafstudeerdje oppe hoeagere sjoeal, mer hae haw deensplich in 't leger. Hae deendje in 't Wied Oeaste en brach 'n meziekgroep genaamp The Cimmerons same veure soldaote te ammezere.

Wayne Hause, de naober, stalj veur det Jenkins 't kós maken inne meziekindustrie. Kort naodet t'r 't leedje Mystery Train van Elvis Presley haw gehuuerdj, begós Jenkins mit 't sjrieve van rock-'n-rollnómmers. Hae góng nao de Sun Studios in Memphis, Tennessee en wirkdje same mit Sam Phillips, d'n eigenieër en stichter van daen studio, veure "richtige klank" te bekómme.

Artiestenaam

't Guuef versjillige verhaole euver wie Harold Jenkins aan zienen artiestenaam Conway Twitty is gekómme. Nao zègke besloot t'r in 1957 det zienen eigentlike naam neet mekkelik zat te ónthaje waas en zoch t'r veur 'ne baeter naam veur op te traeje. In 't Billboard Book of Number One Hits, sjrief Fred Bronson det de zenger nao 'n landjkaart keek en de plaatse Conway in Arkansas en Twitty in Texas zoog en zoea de naam Conway Twitty oetkoos.

'n Anger verhaol geit det Jenkins via ziene manager 'ne miens taengekoom oet Richmond, Virginia in e restaurant in Nuuj-York dae W. Conway Twitty Jr. hoot. De manager deendje in 't leger mitten echte Conway Twitty. Later stalj de manager veur det Jenkins deze naam zów keze ómdet dae get haw. Inne midde vanne jaor sèstig noom W. Conway Twitty daonao de plaat What's in a Name but Trouble op, worin d'r zich beklaagdje euver 't verlere van ziene naam aan Harold Jenkins.

Pop- en rock-'n-rollsucces

Ónger ziene nujen artiestenaam baeterdje de situaasje zich veur Conway Twitty in 1958, dewiel d'r bie MGM Records waas en e radiostation in Ohio speeldje inplaats vannen A-kantj I'll Try ('ne single dae nieks dieëj qua verkoup, radio-oeren en jukebox) de B-kantj It's Only Make Believe, e leed gesjreve door Twitty ennen drummer Jack Nance wen ze in Hamilton, Ontaria inne Flamingo Lounge speeldje. 't Nómmer dieëj e jaor d'reuver veur oppe toepplaats vanne Billboard popmeziekliesten inne Vereinigdje Staote te staon en te blieve, esouch op plaats 1 in einentwintjig anger lenjer; daomit woort 't d'n ieëste vanne neuge top 40 hits die d'r zów make. Mieër es veer miljoen kieër góng de single euveren toeanbank en 't woort 'n gówje plaat. Detzelvendje jaor huuerdje countryzengerin Tabby West 'm en bookdje ze 'm veur oppe show Ozark Jubilee op ABC-TV te kómme.

Wen It's Only Make Believe veur 't ieës woort oetgebrach, gónge väöl loesterieërs d'rvan oet det 't nómmer opgenómme waas door Elvis Presley mit "Conway Twitty" es e pseudoniem; det dore euvereinkómsten in 't stumgeluid. Twitty kreeg hienao nag rock-'n-rollsuccesse mit leedjes worónger Danny Boy (plaats 10) en Lonely Blue Boy (plaats 6). Det litste nómmer brach 'm d'rop ziene band de Lonely Blue Boys te neume, tródsdet ze later de Twitty Birds zówwe waere.

Countrymeziek

David Barnes, Conway Twitty en Loretta Lynn.

Twitty wól al ummer countrymeziek opnummen en vanaaf 1965 dieëj d'r det ouch. Zien ieëste paar countryalbums woorte door sómmige countrydisjokkies neet gedrejdj, ómdet t'r bekandj stóng es 'ne rock-'n-rollzenger. Oetènjelik brook t'r door mit zienen ieësten top 5-hit The Image of Me in juli van 1968, gevölg door zienen ieëste nómmer 1-hit, Next in Line, in november 1968.

In 1970 noom Twitty zien grótste country hit op, Hello Darlin', dae ouch 'tzelvendje jaor woort oetgebrach. Dit nómmer bleef veer waeke lang anen top staon vanne countryhitlies en is ei van zien bekandjste leedjes. In 1971 brach t'r zien ieëste hitduet mit Loretta Lynn oet, After the Fire Is Gone. 't Waas e groeat succes, gevölg door anger nómmers wie Lead Me On (1971), Louisiana Woman, Mississippi Man (1973), As Soon as I Hang Up the Phone (1974), Feelins' (1975), I Still Believe in Waltzes, I Can't Love You Enough en zo wiejer. Same kreeg 't duo, Conway and Loretta, veer achtereinvölgendje jaorprieze vanne Country Music Association es vocaald uo (1972-1975).

In september van 1973 brach Twitty You've Never Been This Far Before oet det drie waeke lang op plaats 1 stóng inne countrylies, mer ouch plaats 22 haoldje inne poplies. Versjillige conservatieve disjokkies drejdje 't nómmer neet ómdet ze vónje det de teks te sexistisch woor.

In 1978 brach Twitty de single The Grandest Lay of Them All oet, in ieër vanne Grand Ole Opry. Aevel veur 't ieës saer 1967 haoldje deze single d'n top 10 neet, ómdet sómmige radiostations weigerdje e nómmer te spele det get vanne concurrent (oetgezónje door WSM-AM) ieërtj. Toch haoldje de single de top 20, piekendj op plaats 16, mer 't waas wied ónger waat me haw verwach, 'tgeen de verangeringe die plaats gónge vinjen in zien karrejaer in gang brachte, worónger e nuuj kapsel, van 't haor nao achter gekeimp nao get królligers. Toch bleef Twitty zien populariteit ónaangetas door 't nómmer, aangezien de volgendje 23 achterein oetgebrachte singles allemaol d'n top 10 haoldje, wovan 13 zelfs plaats 1, worónger Don't Take It Away, I May Never Get to Heaven, Happy Birthday Darlin' en covers van bekèndje pophits, wie The Rose en Slow Hand.

Wen me nao alle Amerikaanse, waekelikse hitlieste kiek, waerdje Twitty zie nómmer Don't Call Him a Cowboy in 1985 de fieftigste single van hem dao op plaats 1 wós te kómme. Toete jaore neugetig wós t'r nag vief anger nómmers op plaats 1 te bringe, womit t'r e totaal haet van 55 nómmer 1-hits. George Strait aevenaardje det stök door in 2002 mit ziene single She'll Leave You With a Smile ouch 50 nómmer 1-hits te kriege, wonao d'r in 2007 zien 56e nómmer 1-hit kreeg mitte single Wrapped.

Gedoerendje 't euverdeil van Twitty zien countrymeziekkarrejaer noom d'r zien plate gewuuenlik op bie Decca Records, later herneump nao MCA. Hae teikendje bie dees maatsjappie anen ènj van 1965, meh vertróch dao in 1981 wen 't sjeen det MCA de focus woor 'nt verligke nao nujer acts; wiejer waas 't management vanne maatsjappie verangerdj, waat same mit nag get anger factoren 'm dieëj besloeten eweg te gaon. In 1982 góng d'r nao de maatsjappie Elektra/Asylum, waat in 1983 mit zie vaderbedrief, Warner Bros. Records fuseerdje. Twitty bleef toete begin van 1987 bie Warner Bros. Records, meh góng trögk nao MCA wo d'r ouch zien karrejaer bie zów volmake. In 1993, kort veurdet t'r stórf, noom d'r nag e nuuj album op: Final Touches.

Honkbal

Twitty speeldje ouch honkbal, zien twieëdje passie. Hae kreeg 'n aanbód veur te spele mitte Philadelphia Phillies naodet t'r de middelbare sjoeala aafhaw, mer hae mós in deens gaon bie 't leger veurdet t'r 't kóntrak kós óngerteikene. Twitty dieëj same mitten óngernummer LArry Schmittou en anger countrymezieksterre wie Cal Smith, Jerry Reed, Larry Gatlin en Richard Sterban in 1977 mit es investeerders inne Nashville Sounds, 'ne kleine honkbalbóndj vanne Double-A Southern League die in 1978 begóste mit spele. Hae goeadje de ceremonielen ieëste pitch (wórp) in 't Herschel Greer Stadium op 26 april 1978. Twitty dieëj ouch honkbalspeler organisere veur 't good doel, wobie d'r döks stri-j taengen 'n team det woor samegezatj door Barbara Mandrell.

Twitty City

Twitty wóndje gelangentied in Hendersonville, Tennesee, juus t'n naorde van Nashville, wo d'r 'n entertainmentkómpleks veure countrymeziek boedje det Twitty Citty hoot. Dit kompléks kosdje $3,5 miljoen. Twitty woor mit zien Twitty City ouch te zeen bieje tilleviesrits Lifestyles of the Rich and Famous en ouch bieje aaflieëvering euver Nashville bie BBC-serie Entertainment USA, prizzenteerdj door Jonathan King. 't Kómpleks woort geäöpendj in 1982 en waas 'n populair toeristische halte gedoerendje de jaore '80 en begin jaore '90. In 1994 woort 't toegedaon nao 'n hölj van e jaor geneump Final Touches, doe ouch fans en collega's oete meziekindustrie langskome. 't Kómpleks woort óngeren hammer verkoch en opgekoch door 't Trinity Broadcasting Network en woort ómgeduip toet Trinity Music City, USA en is aop veur pebliek mit gratis róndjleijinge.

Privaatlaeve

Twitty is veer kieër getroedj gewaes, mit drie versjillige vrólje. Zien ieëste huwelik doerdje van 1953 toet 1954 en waas mit Ellen Matthews. Hae waas mit dem getroedj ómdet die zwanger waas van ziene zoon, Michael. Zien twieëdje huwelik waas ouch 't langste, det mit Temple "Mickey" Medley. Twitty troedje mit Mickey in 1956 en zien drie anger kinjer, Kathy, Joni Lee en Jimmy Twitty, wore mit hem. Mickey en Conway sjèdje inne begin van 1970 en hertroedje in stildje weer anen ènj van 1970. In 1984, nao 28 jaor 'n knipperleechrelaasje te höbbe gadj, woort de stres die Mickey ervoor van 't feit det ziene miens zoea dök eweg waas 'm te väöl en sjèdje ze oppernuuj. Dao wuuertj gezag det de sjeijing óntsting door 't feit det Twitty City 'n aop toeristekómpleks waas en det Mickey zich óncomfortabel veuldje mit alle fans rónjelóm häör hoes. In 1987 troedje Twitty zien 36-jäörige kentoearsekretares, Delores "Dee" Henry. Ze zówwe getroedj blieve toetane doead van Twitty.

In 1981 stapdje Twitty oet zien toerbus wen d'r oetlitsdje oppe traej en vool, wobie d'r ziene kop taenge de traej steet. John Hughey, Twitty ziene steelgitaris, vónj 'm ligkendj oppe gróndj. Väöl luuj, worónger femieljeleje, zagte det Twitty 'n enorm persuuenlikheidsverangering haw doorgemaak nao dit óngelök. Volges zien dochter Joni waas Twitty inkel maondj lang neet good inne kop. In 'n interview zag 't det t'r d'n aafstandjsbedening vannen tillevies oppakdje en d'rin begós te kalle ofwen d'r dach det dae d'n tillefoon waas.

Doead

Op 4 juni 1993 woort Twitty krank dewiel d'r 'n optraeje haw in 't Jim Stafford Theatre in Branson, Missouri en hae haw pien wiedet t'r inne toerbus zoot. Hae stortdje in en woort mit spood nao 't krankenhoes gebrach. Ze dieëjen 'm ras nao de operaasjetaofel, mer hae stórf dao in 't Cox South Hospital in Springfield, Missouri, inne vreug mörgenoere vanne völgendjen daag. Op 59-jäörige laeftied waas t'r gestórven aan aorta-aneurisme inne boek. Hae stórf twieë maondj veur 't oetbringe van zie litste studioalbum, Final Touches. Veer maondj nao zien doead brach George Jones 'ne cover van Hello Darlin' op zien album High-Tech Redneck.

Twitty is begrave gewaoren inne Sumner Memorial Gardens in Gallatin, Tennessee, in 'n roeaj, granete kloes, óngere naam "Harold L. Jenkins". Naeven 'm is 'n plaats vriegehaje veur zien vrouw en ziene zoon Michael.

Discografie

Ónger dees discografie staon de 40 nómmer 1-hits die d'r haw inne Billboard Hot Country Songs.

Next in line (1968)
I love you more today (1969)
To see my angel cry (1969)
Hello darlin' / Fifteen years ago (1970)
After the fire is gone (mit Loretta Lynn) (1971)
How much more can she stand (1971)
Lead me on (mit Loretta Lynn) (1971)
(Lost her love) On our last date (1972)
I can't stop loving you (1972)
She needs someone to hold her (when she cries) (1972)
Louisiana woman, Mississippi man (mit Loretta Lynn) (1973)
You've never been this far before (1973)
There's a honky tonk angel who'll let me back in (1973)
As soon as I hang up the phone (mit Loretta Lynn) (1974)
I see the want to in you eyes (1974)
Linda on my mind (1974)
Touch the hand (1975)
Feelin's (mit Loretta Lynn) (1975)
This time I hurt her more than she loves me (1975)
After all the good is gone (1976)

Games that daddies play (1976)
I can't believe she gives it all to me (1976)
Play guitar play (1977)
I've already loved you in my mind (1977)
Don't take it away (1979)
I may never get to heaven (1979)
Happy birthday darlin' (1979)
I'd love to lay you down (1980)
Rest your love on me (1981)
I am the dreamer (You are the dream) (1981)
Tight fittin' jeans (1981)
Red neckin' love makin' night (1981)
The clown (1981)
Slow hand (1982)
The rose (1983)
Somebody's needin' somebody (1984)
I don't know a thing about love (The moon song) (1984)
Ain't she somethin' else (1984)
Don't call him a cowboy (1985)
Desperado love (1986)

Daonaeve haw Conway Twitty eine nómmer 1-hit inne Billboard Hot 100 in 1958 mit 't nómmer It's only make believe.

Externe link

Officiële website