Vojvodina
Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.
Vojvodina (Servisch: Војводина; Hongaars: Vajdaság; Roemeens: Voivodina; Roetheens: Войводина) is 'n regio en provincie in 't naorde van Servië. 't Is 't insigste deil van 't land det neet op de Balkan leet, maar same mit naoberland Hongarieje leet 't in de Pannonische Vlakde, 'n oetgestrek steppegebeed in Centraal-Europa. De revere de Sava en de Donau vörme de grens mit de res van Servië. Dit gebeed is vreej vlaak en 't steit bekind es de graanschuur van 't land. 't Guuef ouk rilletief vuul staej. Novi Sad is de groeëtste stad in de regio en tegeliek ouk de houfstad van de provincie. Ander wiechtige staej zien Subotica, Zrenjanin en Pančevo.
Vojvodina kint me opdeile in dreej kleinder historische regio's: de Bačka in 't naordweste, 't Banaat in 't oeëste en Syrmië in 't zuudoeëste. Al dees gebede behuurde wies 1918 tot Oeësteriek-Hongarieje. De naam kump van 't Aldslavische waord vojvoda. Det waor 'ne militairen hierser dae e stök gebeed binne 'n land in hand had. De rang is vergeliekbaar mit die van 'nen hertog of 'ne markgraaf beej ós in Wes-Europa. De naam ónstónd in 't rivvelutiejaor 1848, wie de Serve in reactie op de anti-Habsburgse proteste in Hongarieje 't woiwodschap oetrepe. 't Waor wies 1860 'n apart kroeënland binne de Donaumonarchie. De Bačka en 't Banaat woorte ónderdeil van Hongarieje en Syrmië waor al same mit 't Kroatische Slavonië ónderdeil van 't Ónderkeuninkriek Kroatië en Slavonië, det binne Hongarieje autonomie genoot. Beej 't Verdraag van Trianon in 1920 meus Hongarieje, naodet 't d'n Ierste Waereldoorlog verloor, 'n groeët gedeilte van de regio aafstaon.
De regio haet 'n oppervlakde van 21.614 km² en haet óngevier 2 mieljoen inwoeëners. De Serve vörme 'n mierderheid (67%), maar 't guuef ouk 'n groeëte minderheid van Hongare (13%) en vaerder guuef 't kleinder minderhede van Slowake (2,6%), Kroate (2,4%), Roemene (1,3%), Montenegriene (1,1%), Roethene (0,7%) en Macedoniërs (0,5%). De Roma-gemeinschap is heej ouk rilletief groeët en vreuger goof 't heej vuul Pruse. 't Servisch, Hongaars, Slowaaks, Roemeens, Kroatisch en 't Roetheens zien officieel tale.