Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Vuurwerk veuraofgoond aon de 1000e Ieredevisiewèdstrijd vaan Vitesse, op 29 november 2014.
SBV ('Stiechting Betaold Voetbal') Vitesse is 'n voetbalclub oet de Nederlandse stad Arnhem. De club woort in 1892 opgeriech en is daomèt ein vaan de awwer betaoldvoetbalclubs in Nederland. Vitesse heet in zien lang historie wisselende rizzeltaote gebook, meh huurt sinds de jaore 1990 bij de subtop vaan 't Nederlands voetbal. De club späölt sinds 1998 in de GelreDome, e stadion in Arnhem-Zuid. De groetste rivaliteit besteit mèt N.E.C. oet Nimwege, boetege Vitesse de Geldersenderby späölt.
De wortele vaan Vitesse goon al trök tot 1887, wie 'n voetbal- en cricketvereineging mèt de naom Vitesse woort opgeriech. Ind 1891 lufde die vereineging ziech op umtot ze häör terrein mós opgeve. In de luip vaan 1892 weurt de vereineging heropgeriech. Bij de opriechting vaan de Gelderse competitie in 1894 sloot Vitesse ziech astrein aon. Twie jaor later weurt de Ierste Klas opgeriech. Vitesse, wat oetkump in 't distrik Oos, deit dao-in väölal hoeg mèt en weurt diverse kiere kampioen vaan 't ooste. In 1915 waor Vitesse ouch aon e stadion touw; dit woort gerealiseerd aon de noordkant vaan de stad en hètde Monnikenhuize. In 1935 degradeerde Vitesse nao de Twiede Klas.
Pas nao d'n oorlog wis Vitesse de weeg umhoeg weer te vinde. In 1950 woort ouch e nui stadion gebouwd; Nieuw-Monnikenhuizen, wat kortbij 't aajd stadion stoont. Door zien sportief successe kaom de club in aonmerking veur betaold voetbal. Bij de inveuring vaan 't devisiesysteem in 1956 debuteerde Vitesse in de Ierste Devisie. De decennia dao-op brachte wisselend succes. In de jaore zèsteg brach de club jaore in de Twiede Devisie door; in de jaore zeventeg späölde de club noe en daan zjus Ieredevisie. De jaore tachteg waore neet bezunder succesvol, tot de club in 't sezoen 1988/89 kampioen vaan de Ierste Devisie woort.
Mèt 't geld vaan de nuien eigeneer Karel Aalbers kaom in de negeteg d'n ummekier. Dezen Arnhemse zakemaan investeerde sterk in (dèks boetelandse) topspeulers um vaan Vitesse 'n topclub te make. 't Sportief succes trok ouch väöl nui publiek nao 't voetbal, en Nieuw-Monnikenhuize woort oetindelek te klein. In 1998 góng de GelreDome ope, e modern multifunctioneel stadion gebouw um ouch konzèrs en aander eveneminte te kinne hoesveste. In 2000 mós Aalbers evels vertrèkke. Dit had ziene weerslaag op de sportief prestaties en de financië; de club kaom oonderin de Ieredevisie te speule en zat in constante geldnoet. Daobij heersde in de club constante bestuurleke chaos.
In 2010 koch de Georgische zakemaan Merab Zjordania de club op, mèt es doel ze kampioen vaan Nederland te make. Veur dit doel góng Vitesse intensief samewèrke mèt Chelsea FC; diverse speulers oet die Ingelse club woorte (dèks tijelek) bij Vitesse oondergebrach. In 2013 deeg Zjordania de club euver aon de RusAleksandr Tsjigirinski, dee later in 2018 zien aondeile weer aon z'ne landgenoet Valeri Ojf euverdroog. Nao e teleurstèllend ierste sezoen brach dit inderdaod 't sportief succes vaan vreuger trök; d'n opzat um vaan Vitesse ech 'n topclub te make is evels neet gelök. Wel bereikde de club in 2017 e huugdepunt door 't hole vaan de KNVB-beker, d'n ierste pries in häör ganse historie.
Roond 2020 kaom Vitesse in ummer groeter financieel probleme. De investeringe vaan de zakelui hadde geleid tot hoeg sjölde. Oonderwijl góng 't de club sportief ouch neet good, wat de intrèsse vaan investeerders deeg oetdouve. Daobij wouw de club, zeker nao 't begin vaan de Russischen oorlog in de Oekraïne, aof vaan de Russische band. 'n Euvernaome door d'n Amerikaon Coley Parry mislökde; 'n aander oplossing woort zoe gaw neet gevoonde. In aprèl 2024 kraog de club veur straof 18 punte in mindering vaan de KNVB. De club stoont op dat memint al lèste. De financieel probleme waore ouch zoedaonig tot de KNVB Vitesse in juni ouch gein licentie veur profvoetbal kós verliene. Vitesse teikende dao astrein beroop tege aon.
