Saint-André

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

Kèrkske van Saint-André

Saint-André ies 'n op 'n huègde liegkend dörpke in de gemeinte Dalhem in de provincie Luuk in Belsj. 't Bevingk ziech op de grens mèt de gemeinte Herve aan de euverkant van de N672 tegeneuver 't gehuch La Haye. Bie de gemeinteherindeiling in 1977 kaome de gehuchte Lonneux, Neuvehaye en Tiège bie 't dörp Blegny en Saint-André bie Dalhem.

Bezeenswaerdig

• 'n Baksjteine kèrkske oet 1859 (neo-klassiek) mèt róndbaogvènstere en 'ne 12 ièwse sjpietse tore van breuksjtein. De moere hie-van zint 1.20 maeter diek. Oarsjprónkelik waor 't geboew hièl eenvoudig en klein. Róntelum liek 'n kèrkhof mèt 'n aantal ouw helsjteine kruzer o.m. 'n gotisch exemplaar oet 1548.
• Tegeneuver de kèrk 'n weus houte kruus mèt crucifix en aafdaak.
• Ouw häöf en hoezer:
  • Haof van Gorisse, 'n carréboerderie oet de 17e en 18e ièw.
  • Heusière nr 1: 'ne haof oet de 17e en 18e ièw
  • Monceau nr 2: 'n boerderie oet de 18e ièw mèt 'n ovaal boveleech in 'n geboge fronton bove de deur.
• Heuvele, weie, haol waeg en grave.