Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Pierre Huyskens (1972)

Pierre Huyskens (Wèssem, 2 september 1931 - Remunj 19 november 2008) waor 'ne Nederlandse journalis en sjriever.

In zien journalistieke laeve waor hae wirkzaam bie Televizier en in 1972 waor hae hoofredacteur van 't Limburgs Dagblad. In 1975 ging hae nao Elsevier wo hae ‘t brach tot adjunct-hoofdredacteur. Es verwoed sjportleefhöbber en volger van de Runj van Frankriek sjreef hae columns veur de Volkskrant ónger 't pseudoniem Omnium. Ouch veur De Tijd sjreef hae columns mèr dan ónger 't pseudoniem Olympus. Ouch hauw hae jaorelangk 'ne column in het AVRO-radioprogram "Kom eens langs" van Karel Prior. Op ziene naam stóng ouch ein biografie van de ploogleijer Kees Pellenaars.

Huyskens waor 'ne Limburger in hart en nere mèt 'ne humoristische inboorsj, 'tgeen ouch tot oetdrökking kaom in zien journalistieke werk en zien tekste in 't Maaslands dialek. Hae sjreef ónger miè ein Heilige Mès en de musical Stjeelse Druimerie. Hae waor 'ne groate promotor van de Limburgse en Remungse volkscultuur en hae droog bie aan mènnig theatershow en carnavalsrevue. Hae sjreef teves 'n groat aantal declamaties veur de jaorlikse herdinkinge door de veterane en naobestaonde rondj 't Nationaal Indië-Monument 1945-1962, wobie hae teves es ceremoniemeister optrooj.

In 1991 woort hae veur zien väöle verdeenste beneump tot Ridder in de Orde van Oranje-Nassau en in 2001 woort hae, ter gelegenheid van zien vieftigjaorig jubileum es journalis, beneump tot ièreburger van Remung. Huykens waor in 1970 ouch sjtadsprins van de Remungse carnavalsvereiniging D'n Uul. In 1985 woort hae óngersjeije mèt de Orde van de Gulden Humor, 'ne pries van de gezamelike Limburgse carnavalsvereiniginge.

In 2000 woort Huyskens na 'ne vakantie getróffe door 'n herseninfarct wodoor veur heum 't sjrieve en praote bemeujlikt woort en daodoor ziene waereld sjteeds kleiner woort.

Externe link bewirk

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Pierre_Huyskens&oldid=448840"