Kelment

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Baeks, es te dit dialek sjpriks.

---

Kelment (Nederlands: Kelmond) is 'n buurtsjap van Geverik in de gemeinte Baek op 't plateau in Zuud Limburg. 'n Ouw benaming van Kelment is Calmont (15e ièw). De naam kump van 't Latiense calvum montem, dat kale berg beteikent. In Kelment ligke 70 häöf en hoezer.

De sjtanderdmeule bie Kelment

Bezeenswaerdig

't Neo-gotisch kapelke

• Ein van de wiènige windmeules, die Zuud Limburg riek is bevingk zich bove dit gehuch. Dees sjtanderdmeule mèt de naam Sint Hubertusmeule, aan de waeg van Sjömmert nao Baek aan de N 584, is gans van hout getummerd. Ze sjteit op 'n huègde in 't ope veld. In 1971 is de gemeinte Baek eigenaer gewore van de meule. Dao-in weurt nog mèt reigelmaot gemale en 't interieur is dan ouch te bezichtige.
• Op 'n waegsjplitsing sjteit 'n neogotisch kapelke van baksjtein, gewiejd aan Maria.
• De Kelmenderhaof sjtamp groatendeils oet de 18e ièw en is 'n rieksmonument. De poorttore is in 1640 geboewd. Oarsjprónkelik dateert de ganse boew oet 1618. 't Complex huèrt tot de Maaslandse renaissancesjtiel vanwege de baksjtein moere, die verseerd zint mèt mergele sjpeklaoge en hookblokke. Daoneve helsjteine vènstere mèt tösjedörpel. Allewiel is d'r 'ne sauna mèt restaurant in gevestig. Los sjteit 'n 17e ièws bakhoes.
• De Kelmender hellingbösj van 10 hectare weurt beheerd door sjtichting Natuurmonumente. Hie óntsjpringe inkel brönnekes en baekskes, die richting Baek sjtruime. Zie höbbe Baek ziene naam gegeve.
• Diverse ouw boerderieje en vakwerkhoezer.