Gekrusj
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Gekrusj, ooch huidvlèèsj of zoere zult geneumd, is 'n Euregionaal sjtreekproduct. 't Is 'n zoerig, grieskleurig broeëdbelèk dat gemakd is van 'ne in twieë gehówwe vaerkeskóp, get knäöek vör extra gelatien en aander aafvalvlèèsj dat nao 't sjlachte van e vaerke överblieft. Al dit vlèèsj wert in 'ne inmaakskaeëtel gekaoëkd oeëbie 'ne hieël penetraante geur vriekeumt. Laurier en aedsje gaeve d'r typisch zoere sjmaak. Es 't vlèèsj gaar is wert 't dör de vlèèsjmäöle (mèt de groeëtste laoëker) gedriejd. De knäöek broejt me voet en d'r bouillon löt me inkaoëke. 't Vlèèsj en d'r bouillon reurt me dörèèn en dit sjödt me in keump, die kaod voetgezat werre. Dör d'r natuurleke gelatien sjtolt 't gekrusj en kan me d'r sjiefkes of blökskes va sjnieje. Opdene mèt zjwart broeëd, mósterd, ingemakde augurke en zilverunsjes.