Laurier

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De Laurier (Latiense naam: Laurus nobilis) ies 'n greunblievende plant of sjtroek dae veural bekènd ies veur zien gebruuk es keukekroed bie 't koke. 't Veersj geplökde of gedruèg blaad geuf aroma aan bv. sop, saus, marinades, rundersjtoofvleisj, wild, sjtamppot, road moos en roaj krotesjla. 't Blaad zelf ies neet eetbaar. Laurier ies ouch 'n ónderdeil van laurierdrop. De bleuj besjteit oet klein wiete bleumkes en de vröchte zint zjwarte óneetbaar besse.

Subtropische plant

De laurierplant kump oarsjprónkelik oet de Midi. In Nederland weurt de plant veural in pöt gehoute, want ze kènt gein temperature wied ónder 0 grade Celsius verdrage. 'ne Zachte winter kènt ze waal boete euverleve. De plant ies geveulig veur sjildluus es se in 'n muffe umgeving euverwintert.

Lauwerkrans

Van lauriertek, mèt zien greunblievende glimmende blaedsjes, were lauwerkranse gevlochte es ièreteike of es teike van euverwinning.

Laurierkers

Mèt de sjtroek laurierkers (Prunus laurocerasus), dae groater blaar en blome dreug, weurt 'n ander plant bedoeld.