Hozelt

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Völzer, es te dit dialek sjpriks.

---

Hozelt (Nederlands: Holset) ies 'n dörp in de gemeinte Vols in 't heuvelland van Zuud-Limburg. 't Ies gesitueerd op 'ne berg in de buurt van de rieksweeg Vols - Viele - Gulpe - Mestreech. 't Plaetske haet 50 häöf en hoezer, woavan de meiste rónd de kèrk liegke. Ze vörme ein eige parochie.

De Romaanse kèrk van de heilige Genoveva

Romaanse kèrk van Genoveva

Beeldsje van Genoveva in de kèrk

In 1266 weurt de romaanse kèrk, gewiejd aan de heilige Genoveva, veur 't ièrsj geneump. Rónd 1500 ies 't geboew nao 't oaste toe verlengk mèt onder andere 'n koar. Dan óntsjteit 't karakteristiek trapsgewies uterlik. 't Boewwerk weurt geseerd mèt 'ne hoage sjpietse tore. In de 19e ièw versjient 'n kapel tegeneuver d'n ingank. Rónd de kèrk liek 'n kèrkhof mèt onder andere graafkruzer oet de 17e ièw. Binne zint houte beelde te zeen oet de 17e en 18e ièw.

De kèrk ies populair bie pare, die dao wille trouwe. Vanaaf 1900 ies Holset 'n baevaartplaats rónd de heilige Genoveva. Octave (achdaagse vieringe) weure gehoute vanaaf de fièsdaag op 3 januari en vanaaf 20 juni. 'n Ander viering vingk plaats op 26 november. Op Pinksterdaag vingk de groate brónk plaats en datzelfde weekend ies d'r kèrmes.

Dörpsvereiniginge

• Mannekoar St. Caecilia oet 1837
• sjötterie St. Paulus oet 1600.

Häöf en ander bezeenswaerdighede

• De Holsetter haof
• Haof Einrade
• Vakwerkhaof Winnebrook en ander vakwerkhoezer
• De Sieperhaof

't Panhoes ies 'n vreuger broewerie en geboewd van breuksjtein en vakwerk. Aan de Ouwe Aokerwaeg sjteit 'n vakwerkhoes geneump Banket, woa vreuger de rechbank van Holset vergaderde.

Op versjillende krusinge van veldwaeg en haol waeg sjtoon waegkruzer. Van hie oet sjtruimp de Hermansbaek riechting Lemieësj (Lemiers) um daonao oet te mónde in de Selzerbaek.

'n Klein Lourdesgrot achter 'n iezere breer en 'n nis mèt 'n ander heiligebeeld in 'n follie-echtig optrèksel bevinge ziech in 'n lièger gelege gedeilte van t dörp.

De Holsetterbösj ies 17 hectare groat.

Liègeraaf, in de buurt, liek de buurtsjap Weijerplei mèt de monumentale Frankenhaof.