Annie Schreuders-Derks

Dit artikel is gesjreve (of begós) in 't Zösters. Laes hie wie v'r mit de versjillende saorte Limburgs ómgaon.

Annie Schreuders-Derks (Zöstere, 24 december 1943) haet häör laeveslang interesse in de Limburgse volkscultuur geconcretiseerd in häör volkskundig bureau “NostalNu” (heimwieë nao vreuger mit ein eigetieds kleuërke). De door häör bieeingebrachde collectie geuf ein good beeld van ’t laeve van de Limburgse vrouw in al zien facette in de lètste óngerhawve ieëw. Vanaaf 1988 woor ze mitwirker van ’t Limburgs Volkskundig Centrum in Lömmerich (Limbricht). In 1994 begoos zie mit ein eige volkskundig bureau en museum in häör woonhoes in Zöstere. In 2003 wórt det verplaats nao ein nuje rumer locatie in Ech. Dao wórt ‘t “Museum van de Vrouw” opgerich. Dao is Annie es conservator aan verbónje gebleve tot häör pensionering 01-01-2011. Daonao haet zie häör bureau, weer opgepak en trèk zie mit häör verhaole door de ganse provincie. Annie ies lid van de Commissie Veldeke-Volkscultuur.

Óngersjeiinge

Op 19 november 2013 kreeg ze de Jo Hansenprijs oetgereik door gouverneur Theo Bovens vanwege häör beteikenis veur de Limburgse volkscultuur. Ouch is Annie óngersjeije es lid in de orde van Oranje-Nassau. Op 21 jannewarie 2018 kreeg Annie oet henj van wèthauwer Peter Pustjens van de gemeinte Ech-Zöstere de cultuurpries oetgereik. Deze gemeintelikke pries, dae besjtóng oet ein oorkonde en ein beeldje van brons, kreeg Annie veur häör inzet veur de cultuur in de gemeinte Ech-Zöstere. Van de provinciale ómroop L1 kreeg zie op 26 april 2018 nog ein “alternatief” lintje, aangedragen door Bjorn Hoex, veur häör inzet veur ‘t behauwte van de Limburgse volkscultuur.

Werk

Annie is 'n sjriefster oet Zöstere die sjrif in 't Nederlands en in 't Zösters. Thema's en óngerwerpe zeen volkscultuur, fieësdaag, gebroeke, aetgeweuëntes en ander Limburgse tradities. Ze sjrif ouch verhaole en gedichte in 't Zösters dialek.

Verhaole in “Limburgs dierbaar Woord”, 1987.
1992, Uit Anna’s Santenkraam: (Nederlands) Volksgebroeke róndj heilige. Ootgegaeve door Stichting Charles Beltjens, Zitterd
2011, Susteren weerspiegeld: Zoa zagte ze in Zöstere. Verhaole in ’t Zösters. Oetgegaeve door Heemkundeverenigig “de Natuurvrienden” Zöstere.
2012, (Nederlands) De 4-deilige serie: De hele Santenkraam. Limburgse Almanak euver tradities en heilige in lente, zomer, herfs en winter. Oetgegaeve door TIC Mesjtreech

In ènkel nummers van serie LiLiLi.
Biedrages in Platbook 6, 8, 9,10,11, 12, 15