Wille

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Willes, es te dit dialek sjpriks.

---

Gemeinte Wille
Geografie
Gewes	Vlaondere
Provincie	Limburg
Arrendissemint	Tóngere
Geografische coördinate	50°50' N.B. 05°20' O.L.
Oppervlak	26,72 km²
Deilgemeinte	Welle Bjalinge Jotte Ulbeek
Bevolking (Bron : NIS)
Inwuners (01/07/2005)	6861
Mansluj Vrouwluj	3457 3404
Diechheid	257/km²

Wille (Nederlands: Wellen) is e dörp en 'n gemeinte in Belsj Limburg, in 't arrondissemint Tóngere, in de westeleke Haspegouw, t'n ooste vaan Sintruin.

Gemeintefuncties

Wille is traditioneel sterk in 't hoveniersweze, meh in de lèste decennia is ouch de industrie opgekoume, beveurbeeld in 't plasticfebrik ANL Plastics, e sjroepfebrik en 't diskettefebrik Sintinel, wat evels in 2004 failliet góng.

Dörpsgeziech

In Wille steit 'n kèrk gewijd aon Sint Jan d'n Duiper, die nog gedeiltelek in gotische stiel opgetrokke is. De umgeving is hendeg bloomriek. Ulbeek heet 'nen historischen dörpsplei boe-op 't "Haspegouws dörp" in 't Opelochmuseum Bokriek gebaseerd is.

Historie

Oet arsjeologische opgravinge bliek tot 't dörp Wille allezeleve oontstoon is tösse de vijfde en de zevende iew, aon 'n doorwaadber plaots in de Herk. Pas in de twiede helf vaan de twelfde iew versjijnt 't dörp veur 't iers in officieel tractaote, es Wellene of Welnis. Dit vèlt te verklaore oet 't Middelnederlands woord welle, brón, pöt.

Wille waor laank sjatpliechteg aon de Abdij vaan Munsterbilze, die hei e kloester had (gestiech al in 670). Aon dit kloester móste oonder andere tiende betaold weure. Ind achtiende iew waor 't dörp 't centrum vaan de ruiversbende de Bokkerijers; in percesse, gehawwe um 1760, weurt neet minder es 40% vaan de menneleke bevolking geneump in de percesstökker.

Op 'n krusing mèt de weeg nao Kortessem en Gors-Opleeuw stóng de aajdste boum vaan Belsj, 'n zomereik oet ca 800. Bie dizze Slivvenhiereboum verzamelde ziech in de 18e iew de bokkerijers. In 1859, wie de boum getroffe waor door de bliksem, ies 'ne naozaot neve-n häöm geplant. D'n aje boum droog nog ummer sjeut mèt blaar en eikelkes. Op 18 juli 2009 woort de boum geveld door 'ne rukwind.