Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Miëves, es te dit dialek sjpriks.

Audsberge (Nederlands Oudsbergen) is de naom vaan de fusiegemeinte in Belsj Limbörg die op 1 jannewarie 2019 is oontstande oet Miëve-Roj en Glabbek. De gemeinte heet naoventrint 23.000 inwoeners en besleit 'n oppervlaakde vaan 116,24 km². Heimèt is 't in groondgebeed de groetste gemeinte vaan de provincie. De gemeinte umvat de deilgemeintes Elekom, Glabbek, Mieëve, Naerglabbik, Roj en Wiesjage. Gehuchte zien Luiwel en Nuwe Kempe.

Ligking vaan de gemeinte Audsberge in Belsj Limbörg.

Vörming bewirk

Nao de groete hervörminge vaan de jaore zeventeg (ierste runde 1970 en 1971, twiede runde 1977) voont me 't op 't Belsj eve neet mie nujeg um de gemeintes wijer op te sjaole. Roond 2010 späölde die discussie evels weer op. Gemeintes kraoge take debij en gónge ummer mie samewèrke in intercommunales. Op de langen door, meinde me, waor 't neet mie haolbaar um mèt 'n gemeinte vaan roond de tiendoezend inwoeners door te goon. De regering wouw evels gein fusies vaan bovenaof oplègke; in plaots daovaan woorte de gemeintes gestimuleerd um zelf fusies veur te stèlle.

Versjèllende plattelandsgemeintes gónge dao-op in. Op 23 fibberwarie 2016 woort bekind tot de gemeintes Miëve-Roj en Glabbek 'n fusie "wouwe oonderzeuke". Nao 'n oonderzeuk vaan tien maond woort 't plan op 28 november in principe goodgekäörd. Wie de bei gemeinteraode op 26 juni 2017 definitief instumde, waor de fusie bekloonke.[1]

De naom vaan de nui gemeinte waor al ieder bepaold. Börgers mochte hun suggestie indene, boe-oet 'n volksjury daan 'n beperkde keus maakde. Oetindelek woorte oet bekaans 900 inzendinge veer meugeleke naome gehaold: Broekstede, Donderslag, Oudsberg en Oudsbergen. Op 9 mei 2017 kóste alle inwoeners vaan bove de twelf stumme euver de naom. Oudsbergen won oetindelek mèt 63%. De naom verwijs nao d'n Audsberg, e zandduin wat op de grens vaan de twie fusiepartners ligk, en nao diverse kleinder duine dao in de buurt.[2]

Politiek bewirk

Wie de wij umgeving is Audsberge op politiek gebeed conservatief ingestèld. 't CD&V haolde bij de raodsverkezinge 'n absolute miejerheid vaan 17 zetele (op 27). Börgemeister waor tot 2021 Lode Ceyssens (daoveur de börgemeister vaan Mieëve-Roj); sindsdeen is dat Marco Goossens. Allebei zitte ze bij 't CD&V.

Bronne bewirk

Dit artikel is gebaseerd op, meh neet vertaold oet, 't corresponderend Nederlandstaoleg artikel, en wel in dees versie.

Rifferenties bewirk

  1. Oudsbergen.be - Cijfers en feiten
  2. De Standaard - En de nieuwste gemeente van het land heet...Oudsbergen

Extern links bewirk


Belsj Limburg

Alleke | As | Audsberge | Berringe | Bilze | Bóggetj | Bree | Dilse-Stokkem | Diepenbik | Genk | Gingelom | Ham | Haëmet-Achel | Hasselt | Hechtel-Eksel | Herk | Herstap | Heuze-Zolder | Hiër | Hoeiselt | Hôle | Hôtele-Helichtre | Kinder | Kotsoeve | Laoneke | Leopolsbörch | Leume | Loeën | Loei | Lommel | Mechele | Mezeik | Noërekirke | Pelt | Peer | Riems | Sintruin | Tóngere | Voere | Wille | Zietendaol | Zonneve

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Audsberge&oldid=454433"